BSF IG-in Tlabung a tlawh

Border Security Force (BSF) inspector general, Mizoram leh Cachar Frontier bialtu NS Jamwal chuan nimin khan Tlabung a tlawh a, mipuite harsatna a enfiah.

Amah kâwmtu Tla­bung khawtlang hruaitute hnenah, ramria himna a pawimawh thu sawiin, "Boruak a rálmuan loh chuan hmasawnna a awm thei lo," a ti. 

BSF IG NS Jamwal chuan, BSF chu khawtlang mipui tel loin an awm thei lo tih sawiin, harsatna hrang hrang kara ramria venhim hna an thawh chhan chu mipuite himna leh muanna atan a nih thu a sawi a; "He laia kan awm chhan mipuite nen thawhhona leh inlungrualna ṭha vawn nun zel kan duh," tiin, mipui awm lo se chuan BSF-in awmzia a neih loh thu a sawi.

NS Jamwal chuan, venhimna a ṭhat loh chuan ramin hma a sawn thei lo tih sawiin, ramin kawng hrang hranga hma a sawn theih nan ramri leh a chhunga cheng mipuite venhim hna an thawh zel tur thu a sawi a; an mawhphurhna ṭha taka an hlen theihna tura thawhpuiah Tlabunga khawtlang hruaitute a sáwm.

BSF Inspector General hian Tlabunga BSF Border Out Post-a ft. 40-a sanga India hnam puanzar tar chu pawt pharhin a hawng nghal a; 159 BSF batallion-ten computer zirna an kalpui pawh tlawhin, an harsatna te sawipuiin zirlaite a kâwm bawk.

BSF IG NS Jamwal hi deputy inspector general pahnih - KN Suyal leh Akhileshwar Singh bakah, hotu dangte'n an ṭawiawm a; Tlabunga BSF BOP-a an inkawmhonaah West Tuipui bialtu MLA Nihar Kanti Chakma pawh a tel a ni. 



Share this Post

Login to comment
No Comments