Central YMA-in Hâlpuah hâl pawi a ti

Central YMA chuan thuchhuah siamin, kum 2017 Krismas leh kum thar 2018 lawmnate boruak muanawm tak hnuaia hman zawh a ni chu lawmawm an tih thu an tarlang a; chutih rualin, sorkar thupek leh YMA ngenna zawm loa halpuah hal lui mi eng emaw zat an awm chu pawi an tih thu an sawi.

CYMA chuan, Krismas leh kum thar lawmna vuakvetah boruak muanawm a awm theih nana hma latu - sorkar, Police, Excise leh YMA branch hrang hrangte chungah lawmthu an sawi a, "Sokarin Police/Excise temporary beat post hmun pawimawh laia a siam kha a lawmawm kan ti hle a ni," an ti.

Central YMA chuan, sorkarin hâlpuah a khap leh hâl lo tura YMA-in a ngenna zâwm lo an awm chu pawi an tih thu an sawi a; hun lo kal leh zel turah chuan thuawih taka hâl lo ngam tawh turin Mizoram mipui zawng zawng an beisei thu an sawi bawk.

Mizoram pumah boruak muanawm a awm zel theih nan ṭhahnemngai taka mahni hmun ṭheuha ṭan la zel turin CYMA chuan YMA branch zawng zawng an ngen a; kum 2017 Krismas leh 2018 kum thar vuakveta hâlpuah hâl luite chu mahni branch ṭeuhah a ṭul anga enzui turin YMA branch tinte an chah bawk a ni.



Share this Post

Login to comment
No Comments