Central Jail-ah Advance Christmas hmang

AIKO hmalaknain nimin khan Central Jail-ah Advance Christmas hman a ni a; an hun hmanpuitu, Health minister Lal Thanzara chuan, jail chu inhremna ni loin, insiamṭhatna hmun tur atana rua­hman a nih thu a sawi.

Lal Thanzara chuan, sual vang ni lo, vanduai vang leh ngaihtuahna hman fimkhur tâwk loh vangtein jail bang zût theih a nih thu sawiin, "Hringnunah hian beidawn lutuk tur a ni lo a, mi tin hian tih theih leh thiam zawng kan nei a, chu chu a ṭha zawnga hman a ṭul hle. Eng lai pawha min hmangaihtu leh kawng min hrilhtu, kan sualte ngaidama kan thlarau nun chhandamtu Isua Krista neitu nih a pawimawh," a ti.

Isua piang chibai bûk leh hmuah dan a inang lo hle tih sawiin Lal Thanzara chuan, "Mahni lawm zawng leh a behbawma buai luat vanga hmuah tur leh chibai bûk tur ber ngaihsak loa khawvel thil lama buai mai a awl hle," a ti a; jail táng mekte chuan páwn lam tihbuai lohna hmunah, rilru leh thinlung takin chhandamtu an hmuah theih dawn thu a sawi.

Inkhawm hi AIKO general secretary C Lal­chhuanthangi'n kaihruaiin, Synod moderator kal chhuak Rev. Lalzuithanga'n hunserh a hmang a; CYMA general secretary Lal­hmachhuana leh Prison DIG K Lawmthanga te pawhin thu an sawi a ni.



Share this Post

Login to comment
No Comments