V/C member-te inkhawmpui buatsaih a ni Sorkarin VC-te thuneihna tam zawk pek a tum - LAD Minister

LAD leh State Institute of Rural Development & Panchayati Raj  (SIRDPR) bultumin, nimin khan Mizoram hmun hrang hrangah village council inkhawmpui, Village Council Conference cum Panchayat Sammelan buatsaih a ni a; LAD minister PC Lalthanliana chuan, sorkarin VC-te thuneihna tam zawk pek a tum thu a sawi.

Lungleiah chuan V/C inkhawmpui hi Convention Centre-ah neih a ni a, khuallian LAD Minister chuan, khawtlang hruaitu V/C-te chu ram hmasawnna buṭthuta awm an nih thu sawiin, "Rorel khawl pawimawh an nih avangin ram hmasawnna hna chak taka kalpui tur chuan V/C-te an pawimawh hmasa ber a ni," a ti.

PC Lalthanliana chuan, V/C member-te fuihna thu sawiin, "Rorelna dik leh fel in kenkawh chuan ram pumin a sâwtpui dawn a ni,” a ti a; V/C-te chu thuneihna tam zawk leh mawhphurhna sang zawk pe turin sorkarin ruahmanna a siam mek thu a sawi.

Lunglei West bialtu MLA Chalrosanga pawhin thu sawiin, V/C-te chu khawtlang kaihruai tura mipuite thlan tlin an nih angin an khawtlang ṭheuh ṭhatna tura ṭhahnemngai taka thawk ṭhin turin a chah a, "Mipuite'n an chanvo dik tak an hmuh theihna tura hma lak ṭhin a pawimawh a, khawtlang mamawh apiang sorkarah thlen ṭhin tur a ni," a ti.

V/C inkhawmpui hi Kolasib-ah chuan Parish Hall-ah hman a ni a; khuallian, bialtu MLA PC Zoram Sangliana chuan, democracy-a thuneitu tak tak chu mipui an nih thu sawiin, "An aiawh turin V/C leh MLA-te an thlang ṭhin. Sorkarin mipui hamṭhatna tur leh khawtlang leh ram hmasawnna tura a thil ruahman chi hrang hrangte chu department-te kaltlangin V/C kutah hlan ṭhin a ni a, khawtlang tana kutthlaktu tak tak chu V/C an ni," a ti.

V/C member kalkhawmte chu mipuite tana rintlak leh belhchian dâwl ni tura fuihin PC Zoram Sangliana chuan, khawtlang enkawltu tura mipuiin an vote hlu tak hmanga an thlan tlin an nih avangin, vote an zawn laia intiamkamnate leh manifesto-te chu bawhzui a, Pathian leh mipuite hriatpui tlaka hna thawk tur a chah.

Champhaiah chuan V/C inkhawmpui hi Town Hall-ah buatsaih a ni a; khuallian TT Zothansanga chuan, V/C-te chu khawtlanga mawhphurhna sang tak nei an nih thu a sawi.

TT Zothansanga chuan, V/C-te chu khawtlang tana ṭhahnemngai taka mi dang tana thawk ṭhin an nih thu sawiin, "Sorkar pawhin V/C-te hmakhua ngaiin ngaihtuahna a sêng zel dawn. Panchayat Raj hi India danpuiin state tina din tura a tih a ni a, Mizoramah pawh kalpui tum a ni. Amaherawhchu, siam rem leh zir chian ngaite a la awm avangin din a la ni lo," a ti.

Inkhawmpuiah hian V/C member-te chu mithiamte'n thupui hrang hrang an zirtir a, V/C tinin kum kal taa an hnathawhte mipui hmuh theih turin thlalak an pho chhuak a, chung zinga a ṭha zualte thlang chhuakin, pakhatna aṭanga pathumna thleng lawmman pek a ni ang. Inkhawmpui hi vawiinah chhunzawm tur a ni.



Share this Post

Login to comment
No Comments