Lungdai-in ruihtheihthila fihlîmte chawimawi

Lungdai khawtlang chuan an V/C huaihawtin nimin khan Lungdai YMA Hall-ah an khuaa kum 14 -24 inkar, ruih theih thil leh zûk leh hmuam laka fihlim mi 75 chawimawina hun an hmang a, Kolasib district-a khaw fai ber an nih an lawm nghal a; chief minister Lal Thanhawla'n a hmanpui bakah, Indian Society on Tobacco & Health (ISTH) Mizoram president Lal Riliani khuallian a ni.

Chief Minister chuan, Lungdai khuain fai lawmman a dawng thei leh zûk leh hmuam leh ruihhlo laka fihlim ṭhalaite chawimawi nacháng an hria chu entawn tlak a tih thu a sawi a; mi dang ṭanpuina atana Sakawrhmuituai tlanga tui dah khawlna siam tura concept paper an siam lawmawm a tih thu sawiin, "Sakawrhmuituai tlang hi cheng vbc. 939 sênga sak tur Eco-Adventure Tourism Circuit pakua siam turte zingah a tel avangin khualzin mite hmunpui a ni dawn a, Lungdai mipui pawhin remchanna an lak thiam a ṭul dawn a ni," a ti.

Lal Thanhawla chuan, Mizoramah mihring zat tam lo mah se, kum tin phai lama damdawi-ina inenkawlna senso atan cheng vbc. 80-100 sorkarin a sêng thu sawiin, chu chuan hriselna kawngah ṭan lak a ngaihzia a tichiang hle tih a sawi.

ISTH (Mz) president Lal Riliani chuan, Lungdai mipuite chu Kolsib district-a khaw fai ber nihah duh tâwk mai lo a, Mizorama khaw fai ber nih tum tur leh, vaihlo kaihnawih thil awm lohna hmunah an khua siam tum turin a chah a; khaw intodelh ni turin khaw hrisel leh taima nih bakah, thianghlimna leh ruih theih thil leh zûk leh hmuama fihlim a pawimawh hmasak thu a sawi a ni.

Lungdai khuaah hian in 556 awm­in, mi 2,600 vel an chêng a; nimina inkhawmah hian Chief Minister leh ISTH President-in Lungdai khawtlangin an chawimawite hnenah chawimawina thilpek an hlan a ni. CM Hawla hian Lungdai YMA hnenah YMA Hall-a hman tur sound system a pe bawk.



Share this Post

Login to comment
No Comments