Aizawl bawlhhlawh paih dan ngaia paih leh turin Minister-in AMC hotute a ngen

UDPA minister Zodintluanga chuan nimin khan a pisaah Aizawl Municipal Corporation (AMC) mayor PC Lalhmingthanga, commissioner Dr H Lalthlangliana leh AMC hotu dangte a ko khawm a, tunlaia Aizawl khawpuia bawlhhlawh paih dan kalphung thar sawipuiin, bawlhhlawh paih dan chu kalphung ngaia kalpui leh turin a ngen.

Minister Zodintluanga chuan, tun hnaia Mizoram sorkarin SIPMIU kaltlanga AMC hnena bawlhhlawh paih motor 54 a pek chu Aizawl khawpuia bawlhhlawhte chak lehzuala lak khawma paih a nih theih nan a nih thu a sawi a; chutih laiin, tunlaiin Aizawl khawlaiah bawlhhlawh dah khawm leh senghawi loh hmuh tur a tam thu leh mipui aṭangin complaint tam tak dawn a nih thu a sawi. 

AMC-in bawlhhawh paihna tam zawk a kawl tawh chunga bawlhhlawh paih loh leh chhêk khawl hmuh tur a awm chu lungchhiatthlak a tih thu sawiin Zodintluanga chuan, "Mipui tana harsatna siamna lian tak a nih avangin AMC-in theihtawp chhuaha a chinfel a ngai a ni," a ti a; Aizawla bawlh­hlawh chhêk khâwlte chu chingfel thuai turin AMC Mayor a ngen a ni.

Aizawl mayor PC Lalhmingthanga chuan, Aizawl khawlaia bawlhhlawh chhêk khàwl awm chungchang chu vawiin, Nilaini hian a khawihtu committee-in ngaihtuah an tum thu a sawi.

PC Lalhmingthanga chuan, tun hmain bawlhhlawh paih motor 140 vel hman ṭhin a ni a, SIPMIU aṭanga motor 54 an dawn hnuah private motor hman tam tak chu hman zui a nih loh avangin tunah chuan bawlhhlawh paih nan motor 100 vel chiah hman a nih tawh thu a sawi a, "Heng motor-te hi a hmaa a tlan ṭhin aia zing zawka tlantir tum a ni," a ti.

UDPA Minister sawi danin, Aizawl khaw­laiah tun hmain bawlhhlawh chhêk khawm a tam a, a rimchhia a, mipuiin an sawisel nasat ṭhin avangin Mizoram sorkarin local council-te nena ṭanghoin bawlhhlawh lak khawma paih dan tur an rêl a; October 4, 2010 aṭangin local council 60-te nen public private partnership (PPP) mode-in bawlhhlawh paih ṭan a ni. 

PPP mode-a bawlhhlawh paih chu a hlawhtling hle tih sawiin Minister chuan, "Tunah bawlhhlawh paih dan thlak a ni a, kawng sîrah bawlhhlawh chhêk khawm hmuh tur a awm leh ta hi sorkarin a ngai thutak hle a ni," a ti a; bawlhhlawh paih dan chu kalphung pangngaia chhunzawm leh thuai turin Aizawl Mayor a ngen.

Tuna AMC-in bawlh­hlawh paih a kalpui danah chuan, motor tê (LMV)-ah chauh local council-te bawlhhlawh paihtir an ni a, motor lian hmanga bawlhhlawh lak khawm leh paih chu LC-te kut aṭangin laksak a ni. Tuna bawlhhlawh paih nan hian Aizawl chu zone pakuaah ṭhenin, a paih hna chu contractor pakuain an tawk a, bawlhhlawh paih nan SIPMIU-in AMC hnena motor thar 54 a pekte chu hman a ni. 

Nimina meeting-ah hian UDPA secretary Dr C Vanlalramsanga leh joint secretary Van­lal­mawia te pawh an tel. 



Share this Post

Login to comment
No Comments