YMA-in kawng siam mek ṭhaah an ngai

YMA sub-headquarters, Serchhip hnuaia Vigilance & Monitoring Committee hruaitute chuan nimin khan Serchhip leh Bungtlang inkara NH-54 siamṭhat (re-surfacing) hna thawk mek a hmunah an enfiah a; hna thawh tawh chin a ṭha thawkhatah an ngai.

Serchhip sub-hqrs. YMA Vigilance & Monitoring Committee hruai­tute sawi danin, Ser­chhip-Bungtlang kawng re-surfacing hna hi PWD (Highway) enkawlna hnuaiah SLT Infracon Ltd.-in an thawk. December 2, 2017 khan Thenzawl pênga Sailiamkâwn aṭanga ṭanin, nimin thleng khan km. 5 an thawk zo tawh a; December 20, 2017-ah Bungtlang thlen hman an tum a ni.

Serchhip YMA hruaitute chuan, SLT Infracon Ltd. chu NH-54 Bung­tlang-Hrangchalkawn re-surfacing titute tho an ni tih an sawi a; an hnathawh chinah chuan an lawm thawkhat tih sawiin, mit tlunglo deuh lai awmchhun pawh PWD-in siamṭhattir leh thuai an tum thu an lo hrilh niin an sawi bawk.

YMA Sub-Hqrs., Serchhip Vigilance & Monitoring Committee-te hian Bungtlang khaw daia SLT Infracon hmunpui pawh an tlawh nghal a; engineer awmte chuan kawngpui metal tura rawra an hman dan te, cement leh alkatra/bitument/emulsion an chawhpawlh dante an lo hrilh a ni.



Share this Post

Login to comment
No Comments