Kawngpui tâwt chhanah MNF puh

Congress party ṭha­laite chuan thuchhuah siamin, chief minister Lal Thanhawla kaih­hruai sorkarin kawngpui a thâwl zawk theih nan kawng hrang hrangin ruahmanna an nei mek tih an tarlang a; khawpui kawngpui tâwt chhan chu MNF hunlaia chin tawk awm loa commercial vehicle license an pek vangah an puh.

MPYCC chuan, Aizawl khawpui chhung kawngpui a thâwl zawk theih nan sorkarin lirthei intlân chhâwk te, lirthei neite chu a dahna (garage) nei vek tur hriattirnate siam a nih bakah, two wheeler taxi-te siam a nih thu an sawi a, "Commercial vehicle licence pawh awmze nei zawk leh khauh taka pek chhuah a ni a, mahse, MNF kum 10 sor­kar khan ruahman lâwk­na mumal nei loin taxi, etc. permit an pe chhuak ṭhin. A nghawng kal zel avangin tunah harsatna kan tâwk ta a ni," an ti.

Congress ṭhalai chuan, "MNF sorkar laia motor park-na in sakna tur sum tam tham tak an theh chhuah tawhte kha khawiah nge a awm tak?" an ti a; parking tur inte sak a nih leh nih loh an zawt a ni.

Mipuite thu âwih taka garage nei tura an inbuatsaih laiin, MNF party chuan an pisa, Mizo Hnam Rûn kawtah hun rei tak aṭangin hnawksak takin ni tin lirthei an dah ṭhin nia sawiin MPYCC chuan, "Ke-a kalte'n harsatna an tawh phah ṭhin hi pawi kan ti tak zet. Mipuite tana din tum nia insawi leh ram rorelna chan tum party inti tan a mawi lo hleah kan ngai," an ti a; mipui kea kalte leh lirtheia kal velte tan a awlsam zawk nan MNF party mite chu Mizo Hnam Run bul kawngpui kamah an lirtheite dah tawh loin, an pisaah garage siam ve turin an chah a ni.



Share this Post

Login to comment
No Comments