Synod Inkhawmpui neih mek a ni 2018 moderator tur Rev. R Lalhmingthanga

Presbyterian Church of India, Mizoram Synod Inkhawmpui vawi 94-na chu December 5, Thawhlehni khan Bungkawn Kohhran biak-inah ṭan a ni a; nimin khan moderator thar Rev. F Lalrinnunga kaihhruaiin rorel ṭan a ni. Kum 2018 Synod Inkhawmpuia mo­derator atan Rev. R Lal­hmingthanga an thlang.

Synod Inkhawmpui ṭan ni hian chhun lamah Nomination Committee an ṭhu a, zan­ah inlawmna leh report inkhawm neih a ni.

Nimin chawhma khan mode­rator kal chhuak Rev. Lal­zuithanga'n moderator thar Rev. F Lalrinnunga hnena mawhphurhna a hlan hnuah rorel ṭan a ni. Rorel hi December 9, Inrinni thleng neih a ni ang.

Synod 2017-a puipa dangte chu - secretary-ah Rev. Lianhmingthanga Sailo (senior) leh Upa R Dengzikpuia (junior), finance officer-ah Rev. PC Pachhunga leh Rev. H Remthanga, statistician Upa Dr H Vanlalhluna leh, executive secretary-ah Rev. Lalramliana Pachuau leh Rev. B Sangthanga te an ni.

Nimina rorel inkhawm­ah Synod Inkhawmpui 2018, Electric Veng Koh­hran biak-ina neih turah moderator atan tuna Family Guidance & Counselling Centre director Rev. R Lal­hmingthanga thlan a nih bakah, secretary atan Upa R Dengzikpuia (senior) leh Rev. R Vanlalnghaka (junior), finance officer atan Rev. PC Pachhunga leh Rev. H Remthanga, statistician atan Rev. R Lal­nuntluanga, executive sec­retary atan Rev. Lalram­liana Pachuau leh Rev. B Sangthanga te an thlang.

Synod 2019 chu Mission Veng biak-inah nghah a ni dawn a, kum 2020-a Synod Inkhawmpui neihna atan Dawrpui Kohhran biak-in leh kum 2021-a inkhawmpuina atan Republic Veng Kohhran biak-in thlan a ni.

Synod Pastoral Committee-in tun ṭum Inkhawmpuia pro.pastor ṭang lai, pastor-a nemngheh tura a rawt mi 25 (Synod Mission Board) hnuaia thawk mi panga telin)-te chu an pawm a; pro.pastor atana lak thar mi 16-te dah ngheh an remti bawk.

Pro. pastor atana lak tharte hi Synod Pastoral hnuaia thawk tur mi 10, SMB hnuaia thawk tur mi pali, Manipur area-a thawktur mi pakhat leh Tripura Synod-a thawk tur mi pakhatte an ni.

Synod Inkhawmpui hian pastor bial thar panga - East Lungdar Venghlun bial, Chhingchhip Mualpui bial, Kolasib Vengthar bial, Hmawngbu bial leh Kalain (Barak area, Assam) bialte siam a remti a; pastor bial ṭhen­khat siam rem a ni bawk. 

Inkhawmpuiah hian Pathianni chawhmaah pastor nemngheh leh pro­bationary pastor dah­ngheh inkhawm a awm ang a, chawhnuah Lalpa Zanriah Sakramen kîlho a ni ang. Tun ṭuma Synod Inkhawmpui thupui chu 'Kohhran - Pathian chhungkua' tih a ni 



Share this Post

Login to comment
No Comments