Sorkar hnathawkte an chawl Kan tih tur hreh taka tih a ngai dawn - CM

Federation of Mizoram Government Employees and Workers (FMGEW) bultumin, nimin aṭang khan Mizoram sorkar hnathawkte'n a huhoin chawlh (mass casual leave) an la ṭan a, vawiin leh naktukah chhunzawm an tum. Hetih lai hian, chief minister Lal Thanhawla chuan, sorkarin a tih tur ṭulte hreh tak chung pawha a tih a ngaih tur thu a sawi. 

Sorkar hnathawkte hian Central 7th. Pay anga hlawh lâk phûtna atan hian ni thum, December 6-8, 2017 chhung mass casual leave lak an tum a, nimin aṭang khan an la ṭan. Sorkar hnathawkte'n chawlh an lak avang hian sorkar pisate an inkhâr a, sorkar hnathawk pisa kai tum hmuh tur an awm lo. 

Hetih lai hian, mipui ni tin mamawh leh dan leh thupek buaipuitute chuan pisa an kai thung.

FMGEW hruaitute sawi danin, pisa kai an awm leh awm loh thlithlai turin duty an insiam a, mass casual leave an lak chu sorkar hnathawkte'n an zawm ṭha a, harsatna thleng a awm lo.

 District hrang hrangte pawhin chawlh lak hi an zâwm ṭha hle a ni. December 8, Zirtawpni bikah Durtlang Local Council bye-election a awm dawn avangin, chumia mawhphurhna neite chu ngaihnathiam an ni ang. 

Chief Minister chuan nimin khan thuchah tichhuakin, sorkar hnathawkte lakah thiam ang tâwka an inhnuhhniam thu a tarlang a, "Tun hun pawimawh ber kan hman mek lai hian mipui leh sorkar tana harsatna siam lo hrâm tura kan hotute ngennain awmzia a neih theih loh takah chuan, leh kan kohhran hruaitute pawh pun kan tum mek laia harsatna siam an tih tlang takah chuan, keini a hminga sorkar pawhin kan tih tur ṭulte hreh tak chung pawhin kan tih a ngai dawn a ni," a ti.

Mizoram mipuitin an ṭawng­-ṭaisak ṭhin avangin a kaihhruai sorkar a kaltluang hle tih sawiin Lal Thanhawla chuan, "Central Pay Commission recommendation pawh hi ṭum li lai a tihlawhtlingtuah kan ṭang tawh a, kan lawm hle. Tihlawhtling tura kan hotute'n an ngaihtuah apiangin sum dinhmun an inbih chiang a, chumi hnuah fel tak leh tluang taka thil a kal theihna turin Committee dinin, chiang takin thil awmzia an zir ṭhin," a ti a; zir chian hnuah Central Pay Committee ruahmanna an tihpuitlin ṭhin thu a sawi.

CM sawi danin 7th. Pay chu Council of Ministers-in an thlir tawh a, tihpuitlin ve ngei tur tih an pawm tih sawiin, "Kan tih ṭhin dan pangngaiin Sub-Committee sorkarin a din a, sum kalphung thar tur GST leh demonitisation-in a nghawng vanga kan sum dinhmun turte leh state dangte tih dan kan zir ve a ngai a. Hengte avang hian Sub-Committee Chairman atan leh member dangte pawh mithiam vek an ni," a ti. 

Chief Minister sawi danin, sum dinhmun leh state dangte tih dan zir chiang leh zual tur Sub-Committee ruat chu an tih ṭhin dan pangngai a ni a, chu chuan Pay Commission rawtna tihhlawhtlin ngei an tum tih a kâwk a ni. Tih dan phung chu Finance minister Lalsawta'n FMGEW hruaitute lêngah sáwmin a hrilhfiah tawh a, Krismas vuakvetah sorkar leh mipuite harsatna siam lo hrâm turin an ngen a ni. Finance Minister hi minister Zodintluanga leh Planning Board vice chairman H Liansailova ten an ṭawiawm. 

FMGEW hruaitute chu chief secretary Lalmalsawma pawhin lêngah sáwmin, sorkar leh mipuite harsatna siam lo turin a ngen a; tunah pawh hian FMGEW hruaitute leh member-te chu nuar lo hrâm turin an la ngen reng bawk.

Krismas hmuak a, khawvel leh Zoram pumpui a inpuahchah lai leh, ringtute hun pawimawh leh lawmawm a thlen mek laia sorkar leh mipuite tana harsatna thleng tur pawisa loa sorkar hnathawkte an nuar chu pawi a tih thu sawiin CM Hawla chuan, "A dikna takah chuan kan sorkar hnathawk mi 50,000 rual vel hi Zorama mi nuai 11 vel zingah a vannei berte an ni. Thla kipin hlawh an la a, India ramah pawh state pachhe ber e, ti loin, a hlawh ṭha ber zinga mi an ni," a ti.

Hetih lai hian, Chief Minister mawhphurhna la mektu Home minister R Lalzirliana hoin nimin khan Council of Minister-te an ṭhukhawm a, sorkar hnathawkte'n chawlh an lak mek chungchang an sawiho a ni. 



Share this Post

Login to comment
No Comments