NLUP Kûtpui buatsaih a ni dawn

Chief minister Lal Thanhawla hoin sorkar mi pawimawhte'n nimin khan NLUP conference hall-ah NLUP hlawhtlinna hrang hrang phochhuahna tur, NLUP Fare cum Exhibition, 'NLUP Kûtpui' hman dan tur an rêl.

Lal Thanhawla chuan, NLUP chu mirethei lamṭang programme nia sawiin, "Mi tam tak tan malsawmna a ni mek a, hlawhtlinpuitu tam tak an awm tawh. NLUP hlawhtlinnate pholan leh NLUP ṭanpuina dawngtute thil thar chhuah leh hlawhtlinna rahte hralh­na hun remchangah kût buatsaih a ni tur hi thil lawmawm tak a ni," a ti.

NLUP-ah tunlai khawvel mamawh chhanna a awm vek nia sawiin Chief Minister chuan, "Tuihna kang chat mek siamṭhatna te, khawvel lum zel atana mamawh ramngaw ṭha siamna, nungcha humhalh, ei leh bar intodelhna leh mihringte nun khaw­chhuahna atan a thil ṭul tam tak NLUP-ah hian a awm kim vek a ni," a ti a; NLUP chu sorkar laipui pawhin ṭha a ti niin a sawi.

Meeting-a tarlan dan chuan, NLUP Kût hi state level function angin ni li chhung hman a ni dawn a, hall pasarihah NLUP hmalakna leh hlawhtlinna pholanna atan thlalak tar chhuah a ni dawn. NLUP dawr 103 siam tum a ni a, NLUP hmalakna aṭanga ṭanpuina dawngtute kut­chhuak leh thar chhuahte zawrh a ni ang.

NLUP Kût Organising Committee chuan Aizawl­ah chuan NLUP Kut hi Lammuala hman a nih theih nan Lammual enkawltute - Assam Riffles leh Mizoram Football Association dâwr an tum a ni.



Share this Post

Login to comment
No Comments