Lalduhoma'n ngaihdam a dil

ZNP president Lal­duh­oma chuan nimin khan an party pisaah a political testimony a sawi a; Pathian leh mi rilru a lo tihnatsak tawhte chungah ngaihdam dilin, "A bikin MNF leh Congress hruaitute leh an mipui hnenah ngaihdam ka dil a, Zoram mipui pawh ngaihdam ka ṭulna apianga min ngaidam turin ka ngen a ni," a ti.

Lalduhoma chuan, Mizorama political party hmasa ber Mizo Union policy langsar ber chu 'Lal bàn' a nih avangin, mahni leh mahni inbeihna leh inhuatnain Mizote'n politics bul an ṭan tih sawiin, "Chu chu kan po­litical system-ah intuh nghet zelin, hnam dang tih dan entawn tlak lohte thlengin kan chíng ve ta zel a, mimal insawichhiatna leh tlin lohna lai in hmuhsak tum reng rengin kan hmanhlel a ni," a ti a; chu chuan ram siamna tur hmun chu indona leh hmelma siamna hmunah a chantir a, politics-ah Pathian ringtu nihna a lang thei lo niin a sawi.

Politics-a a zin kawngah mi dangte sawisel thiam leh hrât tak, thil tih ṭhat fak thei lo leh chet chhiatna lam sawi nuam ti tak a ni tih a inhmuh thu sawiin Duhoma chuan, "Chu chuan tun hnai deuh aṭang khan ka thlarau a tina a, ka nun hi a hahdam thei tlat lo. Thil sual leh dik lo chu huai takin kan doin kan sawi zel tur a ni a, mahse... thil ṭha ti tur chuan kan hmanrua pawh a ṭha tur a ni tih ka hrethiam ve ta a ni," a ti.

ZNP President chuan, mahni eng ni bik si loa mi dang a lo sawisel nasat ṭhinzia a hmuh thu sawiin, Pathian lakah leh mi rilru a tihnatsak tawhte chungah ngaihdam a dil a; party tin chu khâkna, inhuatna, inîtsîknate tel loa ram rawngbâwl tlang se, chu chu ram damna tur a nih thu a sawi a ni. 



Share this Post

Login to comment
No Comments