MZP-in foreigner thawn haw tura hmalak an rel

Mizo Zirlai Pawl (MZP) chuan nimin khan Electric Veng YMA Hall, Aizawlah Assembly an hmang a; Bangladesh aṭanga Mizorama dan loa foreigner lo lutte thawn haw an nih theih nan hmalak an rel a, kum 2017-19 chhunga MZP president atan L Ramdinliana Renthlei an thlang.

MZP Assembly hi president Lalsangzuala Ngente-in a kaihruai a; Bangladesh aṭanga Mizorama dan loa foreigner lutte thawn haw an nih theih nan hmalak an rel bakah, "Registrar birth & death hi Chakma khuaah a khawihtute Chakma vek an nih ṭhin avangin, ram leh hnam tan a him lo hle a, fimkhur taka kalpui turin sorkarah thlen ni rawh se," an ti.

An thurel zingah, zirtirtu indaih lohna hre reng a, sorkarin zirtirtu lak a tum mek chu rang taka lak a nih a, zirtirtu indaih lohna sikul leh college-ah dah a nih thuai theih nana hmalak te, media kaltlangin Zo nationalism lam hawi inzirtirna uar leh zuala neih te, Mizorama Chakma leh Bru-te chet vel dan buaipuitu tur Sub-Commitee dinte a tel.

MZP hian kum 2017-19 chhunga office bearer turte an thlang a; thlan tlinte chu - president-ah L Ramdinliana Renthlei, vice president-ah B Vanlaltána, general secretary-ah Lalnunmawia Pautu, assistant general secretary-ah H Lalthianghlima, treasurer-ah Michael Lalramsanga leh finance secretary-ah Andrew F Lalramnghaka te an ni. 



Share this Post

Login to comment
No Comments