Aizawl-Lunglei kawng chhiat chhan sawifiah

Mizoram PWD chuan thuchhuah siamin, Aizawl - Lunglei World Bank kawng chhiat dan tlangpui leh siam-ṭhat hna thawh a nih dan an sawifiah.

PWD tarlan danin, Aizawl - Lunglei World Bank kawng hi World Bank aṭanga sum hmuh hmanga siam niin, kum 2011-ah hawn a ni. State highway niin, km. 164-a thui a ni a, a zau zawng chu metre 7.45 niin, blacktop zau zawng chu metre 5.50 a ni. Tlawng lei leh Pukpui inkar bik chu kuminah nasa takin a chhia a ni.

PWD-in kawng chhiat dan a sawifiahna

(Tlawng leh Pukpui inkar)

lKuminah ruahtui a tam a, March thla aṭanga October thlengin ruah a sûr a, he lai hmunah hian tuihna a tam a ni. Lei a thâwl bawk nen, hmun 64 velah lei tawlh a siam a, lei tawlhte hian side drain a hnawh a, lei tawlh leh side drain-te hi tihfai ṭhin ni mah se, a tûk lawka ruahsurin a hmun ngaiah lei tawlh a siam leh ṭhin a, kawng chhuat tuiin a chiah tam phah ni. Hei hian kawng chhuat a tichhe nasa.

lTlawng leh Pukpui inkar hi dâm hmun a ni a, kawng tluan deuh thawin teak chinna hmun a ni a, ni êng a hmu mang lo. Dâm (hnâwn rengna) hmunah kawng a chhe hma zual.

lKawng hi a lûn em em a, Mizoram chhim lam pan motor lian zawng zawngin an zawh a ni. Motor liante hian an phurh rih zawng tur bituk aia tam an phurh ṭhin avangin pressure a pek tur chhût lâwk aia tam daih pressure a pek avangin kawng chhuatin a dâwl lo. Truck ke paruk neite hian metric ton 9 chin chauh phur tur an nih laiin, a tlangpuiin metric ton 12 -15 an phur. Ke 12 nei truck-te chu metric ton 21 phur tur an nih lain, metric ton 25-30 te an phur a, hei hian kawng chhuat a tichhe nasa.

Hmalak dan tlangpui

lFinancial 2017-18 chhungin Aizawl-Lunglei kawng, Kanghmun leh Lunglei AOC inkar km. 64 siam nan cheng nuai 270 dah a ni a, theihtawp chhuahin kumin financial year chhung ngeia siam zawh hman tum a ni.

lPukpuiah hot mix plant dah a ni a, chuta ṭang chuan kawng siamna tur her chhuaha kawng siam tum a ni.

lRuah a la sûr rih avangin quarry panna kawng tam ber a nâl a, motor a lut thei lo a, boulder hmuh theih ang ang lain kawng khuar hnawh mek a ni. Ruahtui tla a reh a, quarry tam zawkah motor a luh theih veleh a chak thei ang bera lung laka hmalak tum a ni. Khua a ṭhat chuan October kar tawp vel aṭangin blacktop hna ṭan hman tum a ni.

lTlawng leh Pukpui inkarah leimin a tam avangin paih fai a, side drain-te thianfaio vek turin private JCB pali leh tipper pahnih hmanga hna thawh mek a ni.



Share this Post

Login to comment
No Comments