Entrepreneurship Awareness Camp ṭan

Nimin khan Mizoram Food Processing Research & Training Centre (MFPRTC), Selingah Aizawla college hrang hrang leh ICFAI Univer­sity leh RIPANS zirlai thlan chhuah bikte tan ni thum awh tur, 'Entrepreneurship Awareness Camp (EAC)' ṭan a ni a; Export-Import (EXIM) Bank chief general manager David Sinate khuallian a ni.

David Sinate chuan, India rama thil thawn chhuah leh lak luh enkawltu EXIM Bank-a kum 25 a awm chhunga khawvel ram hrang hrang a tlawh tawhah, ram zawng zawng inelna leh intihsiakna chu entrepreneurship a nih thu a sawi a, "Entre­preneurship chheh­vel boruak a ṭhat chuan economy a ṭhang mai a, Mizorama entrepreneuship tihhma­sawnna tura EXIM Bank kan rawn tel ve thei hi kan lawm em em a ni,” a ti.

Ṭhalaite tana entre­preneurship kawng inkawh­hmuh chu kawng dik a nih thu sawiin David Sinate chuan, “Entrepreneurship lama kal zui zel tur tan lo pawh hriat chian a ṭul tawh a ni,” a ti a; EXIM Bank chu India sorkar thuhnuaia awm, India leh ram dang insumdawn tawnna lama policy siamtu, enkawltu leh entrepreneur-te sum leh paia puitu a nih thu a sawi.

Entrepreneurship Awareness Camp-ah hian Aizawla college hrang hrang bakah, ICFAI University leh RIPANS-a zirlai 26-te leh Dehradun-a Food Technology zirlai pakhat an tel. Camp chhungin entrepreneurship chung­chang thil hrang hrang zirtir an ni dawn a, industry experience atan practical training neihpui an ni bawk ang.



Share this Post

Login to comment
No Comments