Chhiahtlangah khaw sâwi khâwm Hriatrengna hun CM hoa hman a ni

Rambuai vanga Salam, Sialhau, Vanchengte, Lamchhip leh Vaihal khuate Chhiahtlang khuaa sâwi khâwm a nih kum 50-na, golden jubilee tlin hriatrengna nimin khan Chhiahtlang Middle School khelmualah lawm a ni a, chief minister Lal Thanhawla'n a hmanpui. Lal Thanhawla chuan, Mizo hnam sipaite'n zalenna an sual tih a sawi rualin, MNF hruaitute erawhin anmahni ṭánghma chiah an ûm niin a sawi.

MNF movement chungchangah CM Hawla chuan, "Hnam sipaite'n zalenna an sual a, political leader MNF-te erawhin anmahni ṭánghma chiah an ûm a ni," a ti a; MNF-a tel turin Laldenga'n a sâwm a, mahse, a pa'n a phal loh thu leh, an chhungkuain zanriah an ei laiin sipaiin an man niin a sawi.

Chief Minister chuan, ṭhangtharte thu dik hriat tir chu kawng dik kawhhmuhna leh muanna hlutzia kawhhmuhna remchang a nih thu sawiin, "January 3, 1967 aṭanga inṭanin Mizorama khaw 80% chu 102-ah hrehawm taka sâwi khâwm a ni. Protected & Progressive Village tih hming puttir a ni chungin, sawi khawm khaw chhunga tawrhna nasa tak leh a hming mawi tak chu a inmil thei lo," a ti.

Khaw sâwikhawmnaah kohhran, khaw­tlang nun a zalen lo tih sawiin Lal Thanhawla chuan, "Huan leh lo a siam theih loh vang te, eng hna mah a thawh theih loh avangin ei leh bar a harsa a, nunau an him lo a, mipa tawh phawt chu rinhlelh an ni vek. Kum 1972-ah Gauhati High Court-in dan palzûtna nasa tak a awm tih hriain a titawp a ni," a ti a; kum 20 chhung rambuai vangin hmasawnna a awm theih loh thu a sawi.

Lal Thanhawla chuan, rambuai vanga kum 20 chhung ṭah leh ha ṭhialna chu thil hriat thar leh fo châkawm lo leh hriat chhuah nuam lo ni mah se, ṭhangtharte'n chiang taka an hriat a, pi leh pute tawrhna aṭanga remna leh muanna a hlutzia an hriat nan hmang se a duh thu a sawi a, "Rambuai avangin mi dangte aiin Mizoram pawh nasa takin hnufûm phah a ni," a ti.

Chief Minister chuan politics chu mihringte inrelbawlna leh hmasawnna atana Pathianin a pek a nih thu sawiin, "Hman sual a thiang lo a, mahni leh chhungkhat laináte sahmîm tihpuarna atan hman chi a ni lo a, ram rawngbawlna a ni," a ti a; duhâmna leh sum ngainatna a tel chuan politics a fím thei lo tih a sawi.

Chhiahtlang khawkhawm hriatrengna hun hi Organising Committee chairman Lalremliana'n a kaihruai a, rambuai leh tun inkara thite sûnna hun hman a ni. Chhiahtlang khuaah hian kum 50 chhung tualthahna a thleng lo a, khaw fai ber nihnate pawh lo hauh tawh a ni.



Share this Post

Login to comment
No Comments