Robert Hrangdawla bail dilna Special Court-in a pawm lo

Khehpuam (pseudoe­phedrine) lei leh hralh thubuaia October 4, 2017-a mana Central Jail-a dah luh, Mizoram Chief Information Commissioner (CIC) hlui, Robert Hrangdawla, IAS (Rtd.) bail dilna chu nimin khan ngaihtuah a ni a, Special Court (Drugs & Cosmetics Act) judge Vanlalenmawia'n a hnawl.

Robert Hrangdawla ukil chuan, Robert Hrang­dawla chu hun rei tak aṭanga zunthlum nei a nih thu sawiin, a thusawi tihchianna atan medical prescribtion leh laboratory investigation report Court-ah a thehlut a ni. 

Court chuan, Robert Hrangdawla chu Central Jail-ah a awm tawh avangin, medical report-te chu jail doctor hnen aṭanga dawn tur a nih thu leh, a zunthlum endik tura jail aṭanga hruai chhuah a nih loh thu a sawi thung.

Hetiang a nih avang hian Court chuan, Robert Hrangdawla'n zunthlum a nei ngei em tih a finfiah theih loh avangin, sorkarin a din Medical Board endik turin thutlukna a siam a; Aizawl Civil Hospital Medical Superintendent leh Central Jail Special Superintendent-te chu ruahmanna siam turin a hriattir nghal a ni.

Medical Board-te'n Robert Hrangdawla an endikna lehkha nen bail a dilna chu October 13, 2017-ah ngaihtuah leh a ni ang. Thu dawn danin, February 22, 2017 khan Lengpui Airport-ah Cetri-P mûm nuai 10 man a ni a, Dehraduna-a Cooper Pharma Limited-in Aizawl Luangmuala R&R Medicare-a thleng tura a rawn thawn a ni. R&R Medicare hi Robert Hrangdawla ta a ni. 



Share this Post

Login to comment
No Comments