Central YMA-in chhawmdawlna a sem Chhungkaw 507-te cheng nuai 146.33 pe

Central YMA chuan Mizo­rama leimin leh tuilian tuarte chhawmdawlna tura hmun hrang hrang aṭanga an dawn khawmte chu nimin khan Mizoram hmun hrang hrangah an sem a, Aizawlah chuan Central YMA office-ah sem a ni.

Chawmdawlna sem inkhawm hi CYMA vice president Vanlalruata'n a kaihruai a; CYMA presi­dent Lalbiakzuala chuan, Zo nun mawi a bo ta angin mi ṭhenkhatin an sawi ṭhin tih sawiin, "Thil tam tak siamṭhat ngai chu a awm a, mahse, mite ṭanpui duhna hi chu kan rilruah a la awm reng. Khawvel ṭhang zelin min tibuai mah se, chhungrilah hian mite ṭanpui duhna chu kan la nei a ni," a ti.

CYMA President chuan, chhiat­tawhnain Zo fate inpumkhatna a her chhuahpui tih sawiin, "Hman kum lawkah Myanmar-a Zo hnah­thlakte'n harsatna an tâwk a, 

ṭan­puina kan khawn tawh. Tunah Mizo­ramah chhiatna a thleng a, hmun hrang hrang aṭangin ṭanpuina a lut khawm leh a ni," a ti a; chhiatna thlengin Zo fate inunauna a nghehzia a hmuh chhuahtir thu a sawi.

Lalbiakzuala chuan, Central YMA-in vehbûr a khawna ṭhahnem­ngai taka thawhtu leh khawntu zawng zawngte hnenah lawmthu a sawi a, "Hetiang programme hi lungaihna vanga kal khawmna ni mah se, a lehlam zawng tak chuan kan inpumkhatna lan chhuahna a ni hi a lawmawm hle a ni," a ti.

CYMA general secretary Lal­hmachhuana sawi danin, YMA branch hruaitute'n an huam chhunga chhiat tâwkte'n chhiat an tawh dan form awmsa hmangin CYMA-ah an report a, chumi ang chuan ṭanpuina hi chhungkaw hrang hrangah sem a ni.

Ṭanpuina lutkhawm zawng zawng chu cheng nuai 147.21 a ni a, sem chhuah zawng zawng chu cheng nuai 146.33 niin, Rs. 69,000 chu thlavêng atana dah a ni. Ṭanpuina dawngtu zawng zawng chu chhungkaw 507 an ni a; district danga mite chu an awmna YMA sub-headquarters leh group-te'n an hlan a ni. 

Ṭanpuina sem dan

qThi mi pariat chhungte hnenah Rs. 1,30,000 ṭheuh

qHliam mi pathum hnenah Rs. 50,000 ṭheuh

qIn chhe vek, a hmun ngaia sak lehna tlak loh chhungkaw 34 hnenah Rs. 80,000 ṭheuh

qIn chhe vek, a hmun ngaia sak lehna tlak chhungkaw 46 hnenah Rs. 60,000 ṭheuh

qIn a ṭhen chhia, a hmun ngaia sak lehna tlak loh chhungkaw 14 hnenah Rs. 60,000 ṭheuh

qIn a ṭhen chhia, a hmun ngaia sak lehna tlak chhungkaw 115 hnen ah Rs. 35,000 ṭheuh

qMi in luah, bungraw chán chhungkaw 15 hnenah Rs. 40,000 ṭheuh

qChhan dang vanga ṭanpuina pek mi 41 hnenah Rs. 10,000 ṭheuh

qLawng bo, huan tlai chhia, thingzai bo, etc. chhungkaw 268 hnenah Rs. 7,500 ṭheuh

qKawnpuia chhungkaw pathum hnenah Rs. 26,000 ṭheuh



Share this Post

Login to comment
No Comments