Rampanmawia thu sawi thu tlingah Excise. department-in an ngai lo

Excise commissioner, Lalbiakmawia Khiangte chuan pseudoephedrine khehna nena an man Rampanmawia chu damdawi kheh chungchanga a inhnawmhnawihna an chhui chhuah loh thu leh Rampanmawia'n a statement-a pseudoepherdrine a buaipui ṭhin thu a sawi chu, thu tlinga an pawm loh thu a sawi.

Health minister-in nimina a pisa-a thuthar thehdarhtute a kawmnaa minister ṭawimawmtu Excise commissioner, Lalbiakmawia Khiangte chuan August 20, 2012 a damdawi khehna nia sawi khawl pahnih nena an man Rampanmawia chu damdawi khehah a inhnamhnawih ngei tih an finfiah theih loh thu sawiin, Court pawhin Rampanmawia hi a chhuah tawh thu a sawi.

Excise commissioner sawi danin, Rampanmawia hi damdawi khehna khawl nia hriat nen an man a, Rampanmawia hian Health minister fapa Jacob Lalrinpuia drugs licence, xerox copy a kawl a, he licence hi Health minister-in a pek niin a sawi a ni.

MNF ten Excise hnena Rampanmawia thusawi (Statement) Court aṭanga an lak chhuah a Rampanmawia'n 'Kum 2011 December thla aṭangin pseudoephedrine ka buaipui ṭan' a tih chu thu tlingah an pawm leh pawm loh zawhna chhangin Lalbiakmawia Khiangte chuan, 'Thil a sawi kual a sawi kual a, thu tlingah kan pawm lo,' a ti a, thutlinga pawm si lo Rampanmawia statement Court-a an thehluh chhan chu Rampanmawia Court-in a chhuah theihna atan anih zawk thu a sawi a ni.

MNF-in Rampanmawia statement Court aṭanga an lak chhuak nia an sawi thuthar thehdarhtute an sem aṭanga a lan dan chuan, Rampanmawia hian kum 2011 December aṭangin pseudoephedrine a khawih ṭan a, RK International (Delhi) leh Lotus Pharmacy (Delhi) a dawr tawh a ni.


Share this Post

Login to comment
Latest Comments (2)
gsaparenthlei - 27th Aug 2013 03:25:40 PM

Pu Rokunga (L) in" dikna afamta,felna atlawmta, nun suarang achim,tham leh bawlhhlawhna ten tual an leng'... atih khawvel kha ni e tun a kan zoram hi.


Lalrempuia Ralte - 27th Aug 2013 06:04:08 AM

A hahthlak thin teh e..kan Zoram ve hi zawng!! ban daih mai ani ka chak ni..haha