MNF leh bandh chhan inhmeh lo an ti

ZNP chuan thu­chhuah siamin, MNF party-in September 14-a total bandh huaihawt an tum chu an inhmeh lo hlea an ngaih thu an tarlang a, "Mirethei, ni tina eichawp dapte hmanruaa hman fo chiah kan ngai lo," an ti.

ZNP chuan, total bandh huaihawt tur chu, MNF sorkar laia Mizoram kawngpui a chhiat ve thozia mipuite'n an sawi thar leh hun remchang siamsaknaa an ngaih thu sawiin, 

"Anni hi total bandh siam tur hian an inhmeh lo," an ti a; bandh chu mirethei, ni tina eichawp dapte'n an tawrh­ ṭhin thu an sawi.

Kum 2017-18 budget-ah kawng siamna tur cheng vbc 897.14 dah a ni tih sawiin ZNP chuan, "Heti khawp sum awm chung hian kawng a chhe em em reng. Mipui hian kawng ṭha tak chu kan beisei ngam tawh lo. Kawng khuar zual laite han hnawhkhah a, roadroller-a chìl mâm a, tlân theih tawng tawng tura siam hi chu kan beisei a ni," an ti.

ZNP chuan, MNF sorkar laia Bawngkawn kawngpui pêngṭhuam zauhna tur vantlang tana Lalthai'n a lo hlan tawha thil fel lo awmte chu chhui chiang ngei turin Mizoram sorkar an duh tih an sawi a; "MNF President hminga land lease siam ni si, Dr Don Sapremsanga Holliday (R Tlanghmingthanga makpa)-in Lalrodingi, Mission Veng hnena cheng nuai 150-a a hralh leh daih thei hi chhui chiang a, thu dik mipui hriata puang ngei turin sorkar kan phût a ni," an ti.



Share this Post

Login to comment
No Comments