MNF-in bandh thláwp turin mipui an ngen

MNF party chuan naktuk, Ningani hian zing dar 5 aṭanga tlai dar 5 thleng Mizoram pumah total bandh an huaihawt dawn a; bandh chu thláwpa ṭawiawm turin Mizoram mipui zawng zawng an ngen.

Total bandh huaihawt tur chungchangah hian MNF senior vice president Tawnluia, MNF Action Committee chairman ni bawk chuan nimin khan Aizawl Press Club-ah thuthar thehdarhtute a kâwm a; "Kawng chhe lutuk vanga harsatna tâwk mipui thlavâng hauhna total bandh ram pumah neih a lo ṭul ta a. Zoram mipui zawng zawngin thinlung taka min ṭawiawmna kan dilin kan ngen tak meuh a ni," a ti.

Tawnluia chuan, Congress pary-in kum kaw chhung sorkarna an chelh tawh chhung­in Mizoramah fûr leh ṭhálah kawngpui zawh tlak mumal a awm lo nia sawiin, "Kawng chhia vangin khualzin phur bus, maxicab, etc.-te service thei loin an nuar a, motor chuan man a to a, ei leh bàr phurh man a to," a ti a; kawngpui a chhiat em avangin mipuiin harsatna namén lo an tâwk mek niin a sawi.

MNF Sr. Vice President chuan, national highway km. 1,463 leh state road km. 4,731-te chu neitu leh enkawltu mumal awm lo ang maiin khawtlang hnatlangin a siamṭhat hna an thawk ṭhin tih sawiin, "Chutiang bawkin lirthei neitute leh enkawltute mangangin hna­tlangin a siamṭhat hna an thawk bawk," a ti.

Tawnluia chuan lal chhungkua leh hnamdang contractor-te'n kawngin sum an siam tih sawiin, "Kan rama kawngpui ṭhat lohna chhanah hian corruption nasa tak a inphum tih a lang a, hnamdang contractor-te uchuak taka duhsakin hnungthak inhiahsak tawnin, revised estimate (RE) hmangin sum tam tak an siam tlâng ṭhin tih a hriat," a ti a, mi ramah chuan sum hmangin kawng an siam laiin, Mizoramah chuan sorkar fawng chelhtute'n kawng hmangin sum an siam thu a sawi.

Kawng chhia vanga mipuite harsatnain sorkar ngéng a chhun zawh loh avangin MNF-in October 13, 2015-ah ‘Kawng siam-

ṭhat phûtna kawngzawh’ an huaihawt tawh tih sawiin, Tawnluia chuan, "Kawng siamna hun ṭha tam tak an nei a, chuti chunga mipui harsatna sutkian an tum si loh avangin, hreh tak chungin MNF-in kawng chhe lutuk vanga mipui thlavâng hauhna total bandh hmanga lantir a ṭul ta a ni," a ti a; mipui mangang au thâwmin sorkar béng harh se an duh thu a sawi.

Zawhna chhangin MNF general secretary Lalruatkima, MLA chuan, total bandh hian media-a thawk te, damdawi-ina thawk te, tui semtute leh bawnghnute semtu te, power lama duty pawimawh bikte a huam dawn loh thu a sawi.

Lalruatkima sawi danin, thlawhtheihna leh helicopter hmanga zin tur te, inneih leh chhiatna thila veivak duhte tan chuan kawng hawn a ni dawn. Lengpui Airport-a mi hmuak tur leh zin turte chu zing dar 8 hmaa Aizawl chhuahsan hman tur a ni a, Lengpui Airport aṭanga Aizawl pan turte chu an pan hun tur siam a ni ang.



Share this Post

Login to comment
No Comments