A ni hnihna atan Truck dintir an ni

Mizoram Truck Owners' Association (MTOA) leh Mizoram Truck Drivers' Asso­ciation (MTDA) thu­tlukna angin, Bairabi leh Aizawl inkar kawngpui chhia siamṭhat phûtna atan Mizoram pumah truck-te an tlan lo chhun­zawm zel. Mipui ni tin mamawh phur truck-te chu sorkarin venhimna pek tum mah se, an tlan duh chuang lo. 

MTOA leh MTDA-te'n kawng siam an phût avang hian Thawhṭanni aṭang khan truck-te an ding ṭan a, niminah pawh an ding leh a, vawiinah pawh an ding leh ang. Truck tlan an awm leh awm loh vilin MTOA leh MTDA hruaitute chuan Rangvamual leh Rengtekawnah duty an insiam a, truck tlan luih tum an awm lo.

Rengtekawn leh Bilkhawthlir inkarah truck 100 chuang chu a tangkhang mek a, chu'ngte chu sorkarin venhimna peka tlantir tum mah se, an tlan duh lo a ni. 

MTOA chuan nimin khan thuchhuah siamin, Mizoram pumah truck-te dintir a nih mek laia September 11, Thawhṭanni zanlai vela Sairanga state dang truck a kâng chu mawi an tih thu an tarlang. 

MTOA chuan, lung­awi lohna lantira ni thum chhung truck tlantir loh an tih chu hre lo palh emaw, tlân luih tum emaw an awm palh thuah Rangvamual leh Rengtekawnah duty an insiam tih a tarlang a, "Kan boruak karah tute emaw thil dik lo ti duh an awm palh venthawn thilah police-te pawh pun lâwkin, Rengtekawnah pawh ralmuang takin kan ding thei a, kan lawm hle. Aizawl lamah pawh boruak a ṭha hle," a ti.

Thawhṭanni zan zanlai vela Sairanga state dang truck a kâng tih sawiin MTOA chuan, "Hei hi MTOA chuan pawi a tiin, hetiang boruak kan neih laia hetiang thil a thleng ta mai hi ṭha lo kan ti hle," an ti a; truck chu engtia kâng nge tih ngaihdan pawh an neih thiam loh thu an tarlang.

Hetih lai hian, Food, Civil Supply & Con­su­mer Affairs (FCSCA) department hotute chuan Vanglaini zawhna chhangin, truck-te ni thum chhung an din dawn avang leh a tûkah MNF-in Mizoram pumah total bandh an huaihawt dawn avangin tuialhthei, eirawngbawlna gas leh buhfaiah harsatna lian tham a awm loh tur thu an sawi a, "Kan stock din­hmunin enin harsatna lutuk a thleng lo turah kan ngai. Tuialhtheiah chuan kan stock dinhmun azir zelin rua­hmanna kan siam ang," an ti. 

Rengtekawna

Lirthei táng zat

Thil phurhLirthei

Táng zat

Cement13

Rora6

Balu17

Iron rod3

Buhfai3

Paper1

Chemical1

Electric bungrua1

Thlai6

Ar chaw2

Online shop-

ping item2

Sound system1

Lirthei phur2

Petrol1

LP Gas1



Share this Post

Login to comment
No Comments