Traffic police-te'n khauh an tum

Traffic SP chuan thupek chhuahin, Supreme Court Committee on Road Safety-in a ngaih pawimawh zual traffic dan bawhchhiatna chi li-ah khauh taka dan an kenkawh dawn thu a tarlang.

Traffic SP tarlan danin, Supreme Court Committee on Road Safety-in dan bawhchhiatna pali a ngaih pawimawh zualte chu - zu/ruihhlo rûi chunga lirthei khalh, chak taka lirthei khalh (over/excessive speed), phurh theih chin tur bituk zat aia rit thil phurh (over loading) leh bungraw phur chi lirtheia passenger phurhte leh passenger phur chi lirthei a bungraw phurhte leh lirthei khalh chunga mobile phone hmante a ni.

A chunga tarlan eng emaw ber bawhchhetu driver man chu driving license mansak nghal a ni dawn a, thla thum chhung lirthei khalh thei lo turin driving license hrênsak (suspend) tura tih a ni. Chumi hnuah man nawn leh a nih chuan lirthei khalh thei tawh lo turin driving license tihtawp (cancel) thlenga hrem theih a ni ang.

Nimin thleng khan Aizawl khawpuiah dan bawhchhia lirthei khalhtu driving license 22 suspend a ni tawh a; driving license suspend tura DTO, Aizawl hnenah thawn mek eng emaw zat a awm bawk.

Traffic SP chuan, "Aizawl khawpui chhungah lirthei khalhtu eng emaw zat fel tak tak an awm laiin, fel tâwk lo, dan bawhchhia eng emaw zat an la awm reng a, a bikin rûi chunga lirthei khalh man chu dim an ni lo ang. Traffic police-te hmun tinah an awm sên loh avangin mipuite'n nasa lehzuala dan zâwmin, traffic police-te ṭawiawm turin kan ngen a ni," a ti.

Traffic SP chuan traffic dan bawhchhia hmute chu traffic police helpline-ah hriattir vat turin a chah a; rîkrum thila traffic police puihna mamawh tan biak theih reng an nih thu a tarlang. Aizawl khawpui páwn lam thilah erawh chuan police station/outpost hnai berah hriattir ṭhin turin a chah bawk.

Aizawl traffic police helpline number-te chu - Traffic Station/Control Room - 2322307, 2313061 leh 9485302049; Traffic Deputy SP no. 8974241998 leh Traffic OC no. 9862376929-te a ni.



Share this Post

Login to comment
No Comments