National Remote Sensing Day hman a ni

Mizoram Remote Sensing Application Centre (MIRSAC) chuan nimin khan Directorate of Science & Technology pisa, New Secretariat Complex-ah National Remote Sensing Day 2017 an hmang a; Planning (Science & Technology) minister Lalsawta khuallian niin, MIRSAC-in an neih thar unmanned aerial vehicle (UAV) thlawh chhintir tur a vai liam.

National Remote Sensing Day hmanna hi MIRSAC chief scientific officer leh member secretary Dr RK Lallianthanga'n a kaihruai a; minister Lalsawta chuan, Mizoram sorkar hnuaia department 49 zingah Science & Technology department chu mipui hriat hlawh ni lo mah se, vansang lam thiamna hmangin ram tan nasa takin hna an thawk tih a sawi.

Planning Minister chuan, ram hmasawn turin leilung hausakna chi hrang hrang dinhmun hriat chian a ngaih thu sawiin, "Vansang aṭangin chiang takin unmanned aerial vehicle (drone) hmangin hriat chian theih a ni a, chumi hmanga ram leilung hausakna zira ruahmanna siam chu a hlawhtling ṭhin," a ti a; sorkar department hrang hrangte chu MIRSAC data hmang ṭangkai turin a chah.

Dr RK Lallianthanga chuan, National Remote Sensing Day chu India scientist ropui, Dr Vikram A Sarabhai pian champha August 12-ah sorkar laipuia Department of Space hnuaia ISRO centre hrang hrangin an hman ṭhin thu a sawi a; kumin bikah chuan Inrinni a nih avangin Mizoramah chuan August 11-ah hman a nih thu a sawi.

MIRSAC principal scientist Dr Lalnunsiama Colney sawi danin, India ramin remote sensing satellite 23 a kâp chhuak tawh a, chu'ng zing pakua chuan an hna thawh hun chhung an hmang zo tawh a, satellite 14-in hna an la thawk mek a ni. MIRSAC scientist C Vanlalengkima'n MIRSAC-in tun hnaia UAV a neih thar chu a hnathawh theih dante a sawifiah bawk.

National Remote Sensing Day hmannaah hian sorkar department hrang hrang hotu te, college leh higher secondary school zirtirtute leh zirlai te, Mizorama science kawihhnawiha pawl hrang hrang aiawhte an tel a ni.



Share this Post

Login to comment
No Comments