Citizenship Amendment Bill kan dodal dawn - Zoramthanga

MNF president Zoramthanga chuan, Parliament thlasik ṭhutkhawma pharh tum nia sawiin, Citizenship Amendment Bill, 2016 (Bill no. 172 of 2016) chu an dodal tlat dawn thu a sawi.

Nimina Mizo Hnam Rûna inkhawmah thu sawiin Zoramthanga chuan, "Parliament winter session-a pharh tum a ni a, pawm a nih chuan dan a ni tawh ang. Hemi do tur hian India hmarchhak mi zawng zawng kan sáwm a, Mizoram sorkar leh political party zawng zawng kan sáwm bawk a ni," a ti.

Zoramthanga chuan, Citizenship Amendment Bill, 2016 dodal turin Central YMA-in hma la se a duh thu sawiin, "Political party leh NGO zawng zawng, zirlai pawl leh sorkarte hi hma la turin min sawm se la, signature pe ṭheuh ila kan duh," a ti a; Bill chu MNF-in a tawp thlenga an do dawn thu a sawi.

MNF President chuan, Citizenship Amendment Bill chu ram dang aṭanga India rama lutte kum 11 a awm hnua khua leh tui nih theih ṭhin chu kum 6-ah tihtlemna tur a nih thu sawiin, "Bangladesh aṭanga Chakma rawn lut ru, Chakma foreigner zawng zawngte hi danin a ngaidam dawn a, India khua leh tui ni turin citizenship an dil thei ang a. Chakmate hi India khua leh tui, Mizoram mi dik tak nihna nei an ni tawh mai dawn. Chakma foreigner, dan bawhchhiaa Mizoram rawn lut leh inbengbel zawng zawng hi India khua leh tui nihna pek an ni dawn a, a nghawng chu a pawi hle ang," a ti.

MNF thuchhuah chuan, an president Zoramthanga hian nimin khan Tuithiang Veng hall-ah MNF zawm thar mi 102  a lawm lut niin an tarlang.



Share this Post

Login to comment
No Comments