Lunglei kawng humhalhtute ṭhukhawm

Lunglei Town Road Protection Squad chu nimin khan an chairman Lalzarmawii, Lunglei DC hoin DC pisa conference hall-ah an ṭhukhawm a, Lunglei khaw chhung kawng humhalh dan tur leh mipui him zawk theihna tura hmalak dan tur an ngaihtuah.

Lalzarmawii chuan, kawng humhalh chu sorkarin a ngai pawimawh thu sawiin, "Lunglei khaw chhung a la chêp em em loh avangin hlâwk takin kawng humhalh hna a kalpui theih dawn a, Lunglei Town Road Protection Squad hi mi dangte tana entawntlak khawpa hna thawk ṭha turin ṭan lak a ngai," a ti. 

PWD executive engineer Lalchhuana chuan, kawngpui blacktop chin chauh ni loin, a sir tuihâwk luankawrte pawh mipuiin an ngaih pawimawh a ṭul tih sawiin, "Kawng kama in sate'n nasa takin vantlang kawng an nêk ṭhin a, kawng thlang lam nêk chêp zawnga tuizem dah leh vawk-in sak hi khawpui chhungah hmuh tur a tam hle," a ti a; tuihawk luankawr fel tawk loh vangin chhiatna a thlen ṭhin thu a sawi.

Meeting-ah hian Lunglei khawpui chhunga veng hrang hrang khawtlang hruaitute pawhin an veng ṭheuha harsatna an tawhte an sawi a; Road Protection Squad chuan a hmunah enfiah se an duh thu an sawi a ni.

Khawtlang hruaitute rawtna hi pawmin meeting chuan August 18, 2018-ah inhmuhkhawm a, veng hrang hranga kawngpui chhia, tuihawk luankawr chhia leh thenfai ngaite leh kawngpui nêk chêpna hmunte enfiah ni se, an ti.



Share this Post

Login to comment
No Comments