HIV/AIDS vangin mi 1,568 an thi tawh

Aizawl Civil Hospital (ACH)-a doctor-te pualin nimin khan ACH Seminar Room-ah HIV hrik an pai leh pai loh hriatna tura thisen enfiah leh HIV hrik paite enkawlna lama hmalakna thar  '90-90-90 Targets' zirhona buatsaih a ni. He hunah hian HIV/AIDS vangin mi 1,568 an thi tawh tih an tarlang.

Sensitization programme hi ACH medical superintendent Dr KL Remsanga hoa neih a ni a, April 28, 2017-a bul ṭan, 'Test and Treat' chungchang inhrilhhriatna leh sawi zauna hun hman a ni.

'Test and Treat' programme hi UNAIDS-in kum 2020 atana '90-90-90 Targets' a siam zûlzuia buatsaih a ni a; mi náwlpui zinga 90% tal HIV an kai leh kai loh enfiahna tura ruahman niin, HIV darh tur ven nan HIV+ve hmuh chhuah apiangte chu ART (anti retroviral therapy) damdawi pek nghal zel tura tih a ni.

HIV hrik pai zinga 90% talin ART damdawi an ei theih nan leh ART damdawi ei mek zinga 90% tal an thisena HIV hrik hmuh theih loh khawpa inenkawlna ṭha an dawn theihna tur programme a ni bawk a; Mizoramah chuan June 22, 20017 an kalpui ṭan.

Zirhonaa an tarlan danin, Mizoram pumah HIV/AIDS vangin mi 1,568 an thi tawh. HIV hrik pai hmuh chhuah tawh mi 14,632 zinga 10,835-te ART Centre-ah an inziak lut tawh a; ART damdawi la mek 5,230 awmin, damdawi la chhunzawm lo mi 2,076 an awm.

Hetih lai hian, HIV hrik pai hmuh chhuah tawh si, ART Centre-a la inziak lut lo leh ART damdawi la la lo hrim hrim mi 1,961 an awm a ni.



Share this Post

Login to comment
No Comments