Freedom from Open Defecation Week

Lunglei leh Serchhipah nimin khan inthiarna mumal nei lo awm lohna atana hmalakna chi khat, 'Freedom from Open Defecation Week' hawn a ni a; Week pualin Champhaiah khawlai thenfai hnatlang neih a ni bawk.

Lungleiah chuan MIZOFED kawtzawlah DC Lalzarmawii'n a hawng a; DC chuan, Lunglei district chu ualau taka zun leh êk thiar kawnga 

district fihlim a nih ve thuai theihna turin sorkarin nasa takin hma a lak thu sawi, "Kumin October thlaah hian Open Defecation Free (ODF) district-a inpuan ve hman ngei kan inbeisei," a ti.

Week hawnnaah hian Lunglei khawpui chhunga zirlai naupang leh zirtirute an kal khawm a, Freedom from Open Defecation March neiin, Venglai aṭanga Bazar Veng thleng kawng an zawh a ni.

Swachh Bharat Mission (Gramin) district coordinator F Lalrindiki'n report a pek danin, kum 2012-a Baseline Survey report-ah Lunglei district chhungah inthiarna (individual household latrine - IHHL) nei lo chhungkua 9,841 an awm a, tunah chuan chhungkaw 3,281 tan IHHL sak a ni tawh.

Serchhipah chuan Freedom from Open Defecation Week hi Serchhip Bazarah DC Sangchhin Chinzah-in a hawng a; DC chuan, "Faina leh thianghlimna hi kan nun pumpuia kan ze nghet atana thil ṭul, keini leh kan thlahte thlenga a ṭha zawnga nghawng tam tak nei thei thil a ni," a ti.

Serchhipa Week hawnnaah hian YMA member, sorkar hnathawk, khawtlang hruaitu leh zirlai naupangte an tel.

Freedom from Open Defacation Week pual hian nimin khan Champhai khawpui chhungah District Swachh Bharat Committee buatsaihin zirlaite'n kawngzawh pahin kawtthler thenfai hnatlang an nei.

Hun hman ṭanna Champhai Dawrkaikawnah YMA sub-headquarters, Champhai president C Lalbiakzauva'n a kaihruai a; MUP president K Vanlalzuata'n thu sawiin, "India rama district 700 chuangah Champhai district hi ODF district 82-na a nih vangin páwna dailèn laka fihlim nihna hun hman hi a inhmeh bik hle a ni," a ti.

Khawlai thenfai hnatlangah hian Gandhi Memorial HSS zirlai 500 rualin Dawrkaikawn aṭanga Bethel Venga Circuit House thlengin kawngpui kam an tifai a; Circuit House a khârna hun hman a ni.

Freedom from Open Defacation Week hi sorkar laipui ruahmannaa hman a ni a, August 9-16 chhunga hman tur niin, India ram pumah hman mek a ni.



Share this Post

Login to comment
No Comments