Parliamentary secretary chungchangah Mithiamte ka ráwn mek - Chief Minister

Chief minister Lal Thanhawla chuan, parliamentary secretary neih leh neih loh chungchangah mithiamte a ràwn mek thu a sawi. Mizoramah parliamentary secretary pasarih an awm mek a ni.

Nimin khan Congress Bhavan-ah thu sawiin Lal Thanhawla chuan, "Parliamentary secretary neih leh neih lohah mi dang hrilh kan ngai lo. 

Supreme Court thutlukna a awm tawh a, kan mithiamte'n an enfiah meki. Anni'n thuràwn min pek hunah a ṭul angin kan hotute nena inráwn chungin hma kan la ang," a ti.

Chief Minister chuan thuneihna sang tak a neih thu sawiin, "Danah chuan Chief Minister hian a duh duh minister atan a ruat thei a ni," a ti a; minister-te portfolio pawh mi dang ráwn kher loin, ama thuin a siam rem thei tih a sawi.

Lottery chungchangah MNF-te'n CBI ko lut tura a puihna an duh nia sawiin Lal Thanhawla chuan, "MNF-te hi CBI ko lut turin ka pui a, ka la tihlawhtling hrih lo. Lottery agent pahnih an lo inkhing a, thubuai chinfel a nih hma chuan thil tih theih a nih hrih lo. Thubuai chinfel a nih hunah lottery chhui turin CBI kan ko lut ang, an lo kal duh chuan," a ti.

Chief Minister chuan, Mizo Carbon Product-ah inhnamhnawihna an nei lo tih sawiin, "Court-ah keimah leh minister dang pathum hming an 

thehlut a, kan nihna an tarlan tel loh avangin hnâwl a ni. Tunah hian kan hming thehluh leh an tum em tih chu ka hre lo," a ti a; amah leh minister pathumte chu thubuaiah hian an inhnamhnawih lo tih Mizo mipuite'n hria se a duh thu a sawi a ni.



Share this Post

Login to comment
No Comments