Mobile blood donation hmasa ber nei

Aizawl Civil Hospital (ACH) Blood Bank chuan blood donation bus an neih thar hmangin a vawi khat nan nimin khan Millennium Centre kawtah mobile blood donation camp an huaihawt a; mipa 33 leh hmeichhia pakuate'n thisen unit 42 an pe.

ACH Blood Bank-in blood donation bus an neih thar hi NHM hnuaia State Blood Cell leh HDFC Bank-in pakhat ve ve an pek a ni a, bus pahnih hmang hian khawlaiah donation camp an huaihawt a ni.

Bus hi thisen lak theih nan hmangraw ṭha tak tak - thisen pekna khum (donor couch), air conditioner, telivision, fridge, sound system, generator, ṭhutna leh dawhkântea thuam a ni a; a rualin mi pahnih ve ve thisen lâk (bleed) theih a ni.

ACH Blood Bank hotute chuan, mobile blood donation camp hi hunpui leh ni bikahte leh a remchan hun apiangin khawpui chhung remchangah huaihawt an tum tih an sawi. An mamawh hriaa bus petu HDFC Bank leh State Blood Cell-te chungah an lawm thu an sawi bawk.



Share this Post

Login to comment
No Comments