Bekang eitu mi ṭhenkhat damdawi-inah admit

Nimin khan Tuikual North leh Dinthar vengah bekang ei vanga taksaa harsatna tâwk eng emaw zat an awm a, mi 30 vel chu Aizawl Civil Hospital panpui niin, mi 20 vel admit an ni.

Aizawl Civil Hospital (ACH) Casualty aṭanga thu dawn danin, bekang ei vanga harsatna tawkte hi an pum a na a, kawṭhaloin a zût bawk. Mi 15 chuang admit an ni a, khum awm saah an len loh avangin, hmun remchang laiah khum dawh belh a ni. ACH Casualty-a duty-te chuan, bekang ei vanga harsatna tawkte zingah hian ngaihtuahawm lutuk an awm lo niin an sawi.

Damlote hi bialtu MLA Lalruatkima'n a kan a; zawhna chhanga a sawi danin, mi ṭhenkhat chu hawtir an nih hnuah nimin chawhnu dar 3:30 velah khan ward-ah mi 17 admit an ni a, Casualty-ah mi panga an awm. Lalruatkima chuan, "An khua a sik a, an luak a, pum ná leh kawṭhalo an ni ber," a ti.

Lalruatkima chuan, veng pahnihah hian van-tlang aurinna hmangin bekang ei, harsatna tâwkte chu damdawi-ina kal turin an ngen tih sawiin, nimin tlai dar 4 vel thleng-a damdawi-in pantu chu mi 30 vel an nih thu a sawi a; Vaivakawn lam mi pawh an awma sawi awm mah se, an hriat mai theih rih loh thu a sawi bawk.

Dinthar Branch YMA vice president Cephas Lalrinenga hnen aṭanga thu dawn danin, Dinthar-ah hian bekang ei vanga harsatna tawk chhungkaw pahnih aṭangin mi pakua an awm a, pum ná leh kawṭhalo an ni ber a, an vaiin damdawi-inah hruai an ni.

Cephas Lalrinenga chuan, harsatna tawkte bekang ei chu Dinthar Bazara Sakawrtuichhun lam miin an zawrh niin a sawi a, "Vantlang mike-ah kan au a, nimin lama bekang lei, la ei lote chu ei lo turin kan inhriattir tawh," a ti a; harsatna tawkte zingah bekang chauh ni loin, chêngkawl ei sual pawh an awm niin a sawi bawk.

Tuikual North Local Council hotu James Lalrinnunga hnen aṭanga thu dawn danin, Tuikual North-ah hian chhungkaw pahniha mi 12 ACH-ah hruai an ni a, an zinga mi 10 admit an ni. Anni pawh hi pum ná leh kawṭhalo an ni hlawm.



Share this Post

Login to comment
No Comments