Tuikual South-in pearl jubilee an lawm

Tuikual South khawtlang chuan Inrinni khan Lal Thanhawla Auditorum-ah an veng kum 30 tlin, pearl jubilee an lawm a, an veng pa minister Zodintluanga leh bialtu MLA Lalruatkima ten an hmanpui.

Pearl jubilee lawmna inkhawm hi Organising Committee chairman Chalrosanga Ralte-in a kaihruai a; khuallian Zodintluanga chuan, veng ṭhang zelah Tuikual Veng pakhat ni ṭhin chu rorel awlsam zawk nan North leh South-ah ṭhen a nih thu sawiin, "Veng pakhat ang maiin Tuikual South leh Tuikual North hi an inthurual a ni," a ti a; Tuikual South chunga kawng pawimawhte siam ṭhat a nih theih nan sorkarin tun hnaiah cheng nuai 37 a pek thu a sawi.

Khualzahawm Lalruatkima, MLA chuan, Tuikual chu veng zahpuiawm loh tak a nih thu a sawi a, "Tuikual South mipuite chuan tunlai kan ramin a buaipui social media hmanga dâwta inpuh kualna leh beihnate tireh turin a bul ṭantu nih tum ang u," a ti.

Tuikual South kum 30 tlin lawmna inkhawmah hian an venga village council/local council member ni tawh te, YMA, MHIP, MUP leh Tuikual South Sporting Club hruaitu lo ni tawhte chawimawina hlan an ni a; khaw-tlang hruaitu thi tawhte sûnna hun hman a ni bawk.

Tuikual veng hi kum 1955-ah Tuikual lui hming chawia din a ni a, kum 1963-ah V/C an nei ṭan a, kum 1987-ah Tuikual North leh Tuikual South chu V/C hranah ṭhen a ni.



Share this Post

Login to comment
No Comments