Saron Veng leh Tuithiang inrìnaa leimin Minister Lalsawta'n a enfiah

Aizawla Saron Veng leh Tuithiang inrìnaa June 13, 2017-a nasa taka leimin chu July 14, Zirtawpni zan khan a che nawn leh a, lei tawlhin kawngpui a hnawh pin chu Inrinni zing khan thenfai leh nghal a ni. Lei minna hmun hi Inrinni zing khan bialtu MLA, minister Lalsawta'n tlawhin, thil awm dan a enfiah.

Minister hnenah hian veng pahnih khawtlang hruaitute chuan, leiminna bula Baby Lalrammawii in, RCC building, chhungkaw pasarihin an luah ṭhin chu tlu mai thei dinhmuna a awm tawh avang-in mipui an rálṭi hle tih an lo hrilh.

Tuithiang khawtlang hruaitute sawi danin, lei a chet vang hian Baby Lalrammawii in chu a hlauhawm tawh hlea hriat a ni. In hi July 4, 2017-a Aizawl DC hoa enfiah a nih ṭumin, ṭhiah tura tih a ni a, mahse, tun thlengin kut thlak a la ni lo. Khawtlang hruaitute chuan, Lalrammawii in chu mipuite him zawk nan a rang lama ṭhiah ni se an duh thu an sawi.

Tuithiang leh Saron Veng inrînna hi June 13-a a min ṭumin Saron Venga PC Sangthangi in, Assam type chhawng sarih, chhungkaw paruk luah chu a hnawl a; a hnuah chhungkaw eng emaw zatin an in an riah chhuahsan a ni.



Share this Post

Login to comment
No Comments