Vawiinah India President thlang dawn

India President thlanna chu vawiin hian India ram pumah neih a ni dawn a, Mizoramah pawh neih a ni ang.

President thlanna hi chawhma dar 10 aṭangin neih a ni dawn a, Mizorama vote thlakna hmun tur chu Assembly Secretariat conference hall-ah a ni.

President thlang theitute hi Member of Parliament (MP)-te leh state leh union territory-a Assembly member (MLA)-te an ni a; Mizoramah chuan vote nei mi 42, MP pahnih leh MLA 40 an awm.

President thlannaa vote tlate chu July 20-ah New Delhi-ah chhiar a ni ang. President ni lai, Pranab Mukherjee term chu July 24, 2017-ah a tâwp dawn a, President atana thlan tlin chu July 21-ah President atan lak luh beisei a ni.

BJP leh an thawhpuite chuan President candidate atan MP hlui leh Bihar Governor hlui Ram Nath Kovind (Uttar Pradesh mi) an nei a; Congress party leh an thurualpui-te candidate chu MP hlui leh Lok Sabha speaker hlui Meira Kumar (Bihar mi) an nei thung.

Tun ṭum President thlanah hian ram pumah vote thlak thei mi 4,896 an awm a; chungte chu - Rajya Sabha MP mi 233, Lok Sabha MP mi 543 leh Assembly MLA mi 4,120 an ni. President-a tling tur hian vote tla zinga a zatve aia tam hmuh a ngai. MP leh MLA-te vote hian hlut zawng a nei a, state dinhmun azirin a hlutna a danglam thei.

MLA-te vote hlut zawng chu - MLA zat-in state mihring zat sem (divide) tur a ni a, chumi chuak chu 1,000-in sem leh tur a ni. Mihring zat hi kum 1971 chhiarpuia mi zat hman tur a ni a, hei hi kum 2026 thleng hman a ni ang. Kum 1971-a Mizorama mihring zat chu 3,32,390 a ni a; Mizoram MLA pakhat vote hlut zawng chu 8 a ni.

President thlannaa MP leh MLA zawng zawng vote hlut zawng chu 10,98,903 a ni a, MP-te vote hlut zawng belhkhawm chu 5,49,408 niin, MLA-te vote hlut zawng belh-khawm chu 5,49,495 a ni.



Share this Post

Login to comment
No Comments