ZEM-in Val Upa Council an dah pawimawh

Zoram Exodus Movement (ZEM) chuan July 15, Inrinni khan an thil tum leh kal dan turte Kolasib-ah an puang a; ZEM convener Rev.Dr K Thanzauva chuan, ZEM duh ang sorkar tun din a nih chuan, Val Upa Council thutlukna chu kalphung tur a nih tur thu a sawi.

Kolasib Press Club-a chanchin­bumite an kawmnaah Rev. Than­zauva chuan, "Ram hmasawnna tur hna thawh leh zirnaah party induh­sakna a nasat lutuk vangin Mizo­ram hmasawnna a ṭhuanawp a, zirna kan sawp chhe zo tawh a. Deve­lopment leh education chauh tal hi chu party politics tihbuai theih loh tura hruai chhuah ngei a ngai," a ti.

Rev.Dr K Thanzauva chuan, "Sorkarin zirna atan sum a seng tam tial tial a, sorkar sikulah zir duh an tlem tial tial a, sikul tam tak chu khâr a ni tawh," a ti a; zirna chu a chhawrtu vantlang kutah dahin, communitisation system hmanga siamṭhat theih a nih thu leh, chutiang chu ram tam takin an hlawhtlinpui mek thu a sawi.

State level leh district level-ahte Development Board siamin hmasawnna hna thawh theih a nih thu sawiin K Thanzauva chuan, "Hmasawnna hna tênau deuhte chu party worker-te'n an inchuh a, a chang chhunte'n kut tling takin thawk se a la ziaawm. A tam zawkin hralhin sum tuak nan an hmang a, hna lian tham deuhte chu contractor-in hming tumin a phênah chanvo nei an awm ṭhin niin a lang. Heng vang hian kalkawng te, building-te a tlo loh phah a, a tuartu chu mipui an ni zel," a ti.

ZEM hotu tur chungchang zawhna chhangin Thanzauva chuan,  "Inkaihhruai dan atan chuan kohhran (Synod) kalphung hi a ṭhain a nghet ber a, hotu lawk bik awm loin committee thutlukna an zui mai a ni," a ti a; ZEM kaihhruaina hnuaiah sorkar tun din a nih chuan, Val Upa Council thutlukna chu an kalphung tur a nih thu a sawi a ni.

ZEM puipate zinga mi K Sap­danga chuan, kum 30 chhung chu symbol pahnih khaikhinin, phûr lo chung chungin mipuiin khua leh tui ṭha nih vangin Assembly inthlanah vote an thlak ṭhin tih sawiin, "Kum 2018 Assembly inthlanah chuan khaikhin tur symbol langsâr pathum a awm beisei a ni," a ti a;  mipui pawhin phûr taka vote an thlak beisei a nih thu a sawi.

Mizoram, state pachhe tak, hma­sawnna mawngphaha awm mek chunga lirthei man to leh khawsak nawmsakna lama ram hruaitute an kal nasa chu a inhmeh lo tih sawiin K Sapdanga chuan, "Mipui mamawh doctor rawihna a indaih loh phah a, mipuite hriselnain a tuar a, zirtirtu rawihna te, sikul sak ṭhatna turte sum a indaih loh phah a, zirnain a tuar bawk," a ti.

K Sapdanga chuan, "Kum 2018 inthlanah mipuite'n kan khaikhin tur chu, intodelh nge kan duh a thlawna sem hun nghah? Kal dan pangngai nge kan duh kalphung thar, hahdam taka retheih nge kan duh thawkrima hausak, thlâk ngam loh lal fál rorel nge kan duh a huho rorel, tihte a ni ang," a ti bawk.

ZEM hian Aizawl bakah, district khawpui pathumah an thil tumte an puangzar tawh a, district khawpui dangte leh khaw dangte pawh tlawh zel an tum a ni.



Share this Post

Login to comment
No Comments