PWD-in MSR II-RTCP hnuaiah Kawngpui pathum an siam mek

Mizoran PWD chuan Mizoram State Roads - Regional Transport Connectivity Project (MSR II-RTCP) hnuaiah hmun pathumah kawngpui siam hna an thawk mek a; chu'ngte chu Chhûmkhûm-Chawngte kawng, Champhai-Zokhawthar kawng leh Tlabung-Kawrpuichhuah kawngte a ni.

PWD-in July 13, 2017 thlenga kawng siam dan dinhmun an tarlannaa a lan danin, kawngpui pathumte hi India leh Myanmar leh Bangladesh ramri hnaiha inkalpawhna kawngpui ṭha a awm theih nana tih a ni a, a pathum hian international boundary hnaiha mi vek an ni.

Kawngpui pathum siamna atan hian sorkar laipuia Ministry of External Affairs, Mizoram sorkar leh World Bank hnuaia International Development Association (IDA)-te chuan August 28, 2014-a inremna an ziak. Loan agreement angin, kawngpui zauhna atan hian US dollar nuai 1070 ruahman a ni a, a siamna tur sum hi World Bank aṭanga hmuh a ni.

Chhûmkhûm-Chawngte kawng hi km. 41.529-a thui a ni a, Champhai-Zokhawthar kawng siam tur chu km. 27.247-a thui niin, Tlabung-Kawrpuichhuah kawng siam tur chu km. 12-a thui a ni thung.

Chhumkhum-Chawngte

Chhumkhum-Chawngte kawng chu village road standard aṭanga NH standard-a siam hna chu thawh mek a ni a, cheng vbc. 237.74 ruahman a ni. Kawngpui hian Rângte, Lalnutui, Lungráng leh Rualalung khuate a paltlang dawn.

Kawng siam tur hian September 17, 2014-ah agreement ziah niin, November 19, 2014-ah hna thawhna tura hriattirna (notice) chhuah a ni a, contractor JKM Infra Project Ltd., Noida-te'n December 10, 2014-ah hna an ṭan a ni.

Kawng chu double lane, metre 12-a zaua siam tur a ni a; a siam hna hi thla 48 chhunga thawh zawh tura tih niin, chu chu December 2018 a ni. Tun dinhmunah hmun thuma 

ṭhena hmun khat vel (34%) thawh a ni tawh a, kawng laih zawh tawh chin chu km. 23.81 niin, blacktopping tih a la ni lo a; cheng vbc. 60.60 sen a ni tawh. 

Champhai-Zokhawthar

Champhai-Zokhawthar awm mek chu state road standard niin, km. 28.5-a thui a ni a, MSR II-RTCP hnuaia kawng sial thar leh kawng awm sa zauh hna thawh mekah chuan km. 27.247-a thui tur niin, national highway standard, double lane a ni ang. Kawngpui hian Champhai veng ṭhenkhat, Zotlang, Mualkawi, Mélbûk leh Zokhawthar-te a paltlang dawn.

He kawng siam tur hian November 14, 2014-ah agreement ziah niin, December 4, 2014-ah hna thawk tura hriattirna chhuah a ni a, December 26, 2014-a hna ṭan niin, kawng siamtu contractor chu Tarmat Ltd., Mumbai an ni. Kawngpui siam nan hian cheng vbc. 162.40 hmuh a ni.

Champhai-Zokhawthar kawngpui siam hna hi thla 42 chhunga zawh tura tih niin, chu chu October 2018 a ni a; July 13, 2017 thleng khan hna thawh tur aṭangin 53% thawh a ni tawh. Kawng laih (formation cutting) chu km. 20.9 zawh tawh niin, culvert 58 siam a ni tawh a; blacktop tura lung phah tawh chin thui zawng chu km. 9.1 niin, km. 2.6-a thui blacktop a ni tawh. Cheng vbc. 54.73 hman a ni tawh bawk. 

Tlabung-Kawrpuichhuah

Tlabung-Kawrpuichhuah inkarah hian kawngpui, village road standard a awm mek a, chu chu MSR II-RTCP hnuaiah hian national highway standard, double lane, metre 12-a zaua siam tur a ni. Hmun 

ṭhenkhatah chuan kawng awm sa ring loin, kawng thar laih a ni ang.

He kawng siamna tur hian August 12, 2016-ah agreement ziah niin, August 26, 2016-ah notice chhuah a ni a, August 16, 2016-ah hna ṭan a ni. Kawng siamtu atana contractor thlan chu ABCI Infrastructures Pvt.Ltd., SIlchar an ni a; a siamna atan cheng vbc. 154.37 hmuh a ni.

Tlabung-Kawrpuichhuah kawng hi thla 30 chhunga siam zawh tura tih a ni a, March 2019-ah zawh tur tihna a ni. July 13, 2017 thleng khan km. 4.59-a thui laih zawh a ni tawh a, blacktopping tih a la ni lo a, hna thawh tawh chin chun 21.5% a ni. Hna thawh tawh chinah hian cheng vbc. 12.24 hman a ni tawh. 



Share this Post

Login to comment
No Comments