SSA sum hmuh tawhah hlawh atana pek chhuah loh a awm lo - Himpuia

Joseph Lalhimpuia chuan, November 23-a district tina nuai 847.20 sem chu hlawh atan a nih thu sawiin, chu chu thla khat hlawh daih chauh a nih thu a sawi a, "A bak nuai 594.11 chuan thla khat hlawh a daih tawh lo a, la kawl ṭhat a ni," a ti. 

Sum hmuh tawhte chu first instalment a ni tih sawiin, Central-in second instalment la pe lo mah se, Mizoram sorkarin a do letna tur chu Finance department-in December 22 khan a pe lâwk tawh a, mahse, chu chu SSA account-ah a la lut lo tih a sawi.

Lalhimpuia chuan, SSA-a thawkte chu July 2016 thleng hlawh pek tawh an ni a, August thla hnu lam hlawh pek an la ni lo tih sawiin, "December 22-a state share pek tawh hmangin Central-ah kan dil mek a, second instalment-ah hian Central-in vbc. 71 vel min pek a tum mek a ni," a ti.

SSA tana state matching share pek turah state sorkarin a tih tur a ti lo anga sawi awm chu a dik lo tih sawiin, Lalhimpuia chuan, "State chuan a tih tur a la ti vek a. SSA-a thawkte'n hlawh an la thei lo hi kan khawngaih em em a, hlawh an lak theih nan theihtawp kan chhuah a ni," a ti. Chutih rualin, SSA tana sum hmuhte chu hlawhah ringawt a hman theih loh a, thil dang­ahte pawh hman a ngai a, a bikin school uniform leh textbook sem turte chu tihkhawtlai chi a nih loh thu a sawi.

Joseph Lalhimpuia chuan, SSA document pawi­mawh pûtrû leh social media-a tarlan vanga police station-a report theh­luh chungchanga zawhna chhangin, a puhrûk ṭanna chu police-te'n an chhui chhuah an beisei thu a sawi a, "Department-ah pawh kan inen ve mek," a ti.

SSA-a thawk ṭhenkhat Aizawla inhmukhawm ṭhinte an hriat thu leh MLA ṭhenkhat an tel dante pawh an hriat thu a sawi bawk.



Share this Post

Login to comment
No Comments