Defence Seminar leh Police Meet-ah Larsap

Governor Lt. Gen. Nirbhay Sharma chuan, tun hnai khan Secundarabad-a College of Defence Management (CDM)-in Annual Seminar 2016-2017 buatsaih leh Sardar Vallabhbhai Patel National Police 

Academy, Hyderabad-a ‘35th All India Police Equestrian Meet’  neih a hmanpui.

CDM Annual Seminar-ah hian Governor chuan, sorkar laipuiin defence tihchangtlung lehzual a tum laia CDM hotute'n Defence Management Seminar an huaihawt chu lawmawm a tih thu sawiin, "Defence expenditure leh budget ngaihtuahhonaah hian kan thil tum ber tur chu ram hmasawnna tho tho a ni. Defence chuan ram dangte nena kan inlaichinna leh technology lama ram hmasawnna thleng a khawih avangin a pawimawh hle a ni," a ti a; India chu defence lama insengso sang ber ram pangana a nih thu a sawi.

Defence force chuan ram venhim hna piah lamah hnathawh tam tak an nei tih sawiin Larsap chuan, "Ram chhung bo­ruak hrang hrang azirin sipaite hnathawh tur a tamin a danglam ṭhin. Vawiin thleng hian politics-a thuneihnaah armed force-te an inhnamhnawih ngai lo a, lang­tlang leh fel takin a la kal zel thei hi a fakawm a ni," a ti.

35th All India Police Equestrian Meet neihah Governor hian khuallian niin a hman pui a, inelnaa tiṭhate hnena lawmman a sem zawhah National Police Academy-a police training neih dante a thlir a, police thite hriat­rengna lungphunah pangpar dahin zahna a lantir nghal a ni.



Share this Post

Login to comment
No Comments