Assam-a oil khur kangah kangṭhelhtu pahnih thi

Assam-a Tinsukia district-a Baghjan oil­fied-a oil khura kangmei chhuakah Oil India Limited (OIL) kangṭhelhtu pahnih an thi. 

Ni 14 chhung gas a put hnuah Thawhlehni zan khan oil khurah hian kangmei nasa tak a chhuak a, a bul hnaia in leh thingkung eng maw zat a kang tel a ni. Kangmei chhuak hian km khat bial vel a tuam a ni. 

OIL thupuangtu Tridiv Hazarika chuan kang­ṭhelhtu pahnihte hi an chin  hriat loha an awm hnuah kangmei chhuahna bulah an ruang hi hmuh a nih thu a sawi. Kangmei chhuak hi meter 50 bialah chuan an ṭhelhmit thei tawh a, mahse gas leak te siamṭhat a, thunun vek tur chuan ni 25-28 vel a ngai dawn niin expert-ten an sawi a ni. 

Chhiatna thlen chung chang hi chief minister Sarbananda Sonowal chuan prime minister Narendra Modi pawh a hrilh tawh a, PM chuan theihtawpa puih zel a lo tiam a ni. Kangmei chhuahna biala chengte pawh hmun him lamah lakchhuah vek an ni tih CM chuan a sawi. 

Guwahati aṭanga km 500-a hlaa awm, Baghjan oil khur-ah hian May 27 aṭang khan gas a put tawh a ni a, a chhehvel boruak pawh a tichhe hman tawh hle. He oil khur awmna aṭanga km 1.5 biala awm, mi 6,000 te chu relief camp-ah an awm mek a, Oil India chuan harsatna tawk chhungkaw tin hnenah Rs 30,000 ṭheuh pek an ni dawn tih a puang tawh bawk.