RTI Act-in PM Cares Fund huam tel tir tura ngenna a hnawl

Delhi High Court chuan PM Cares Fund langtlang zawka kalpui a  nih theihna tura Right to Information (RTI) Act-in huam tel tir tura ngenna thehluh chu a hnawlsak. 

Delhi High Court-a Public Interest Litigation (PIL) thehluhah, PM Cares Fund chu 'public authority' a ni a,  sorkar laipui 'owned', 'controlled' leh 'substancially financed' chu RTI Act-in a huam vek tur a ni, a ti. 

Covid-19 dona tura duan bik a nih avangin he hri kai mekte chuan hri dona tura sum hmuh a nih dante chu hre turin dikna an nei a ni, a ti bawk. PM Cares Fund-a sum hmuh leh hman dan kimchangte puanzar a nih loh chuan rinhlelhna a awm belh zel a, he fund enkawltute ngei pawhin mimalin hlawkna engmah an la lo tia website-a tarlan a nih avangin eng vanga Fund chungchang chu zep tlat ngai ngei a nih tih an zawt zui bawk. 

Petition thehluah hian thla hnih chhungin PM Cares Fund-ah hian cheng vaibel­chhe 10,000 vel a lut tawh tih an tarlang bawk a ni. 

Delhi High Court chuan hemi chungchang hi Karna­taka High Court-ah ngaihtuah tura thehluh a nih tawh avangin a ngaihtuah thei lo tih a sawi.