Liverpool chetsual leh Covid-19 intawng

Jurgen Klopp hnuaiah Liverpool-in season ṭha tak an hmang a, match 21 an khelhah point 61 hmu tawhin Europe league sang pangaah season bul ṭan ṭha ber record an siam. Hemi hnu hian match ruk chak zawn lehin match 27-ah point 79 an hmu tawh a, Arsenal record nih ruala hneh loh nei loa league nomawi chawi thlengin an inbeisei hman. 

Amaherawhchu, February 29 khan Liverpool hian Watford 3-0 in an hneh lo a, Arsenal record ropui a him. Hei chauh hi ni loin Reds hi Chelsea hneh loin FA Cup aṭangin an tla zui a, Champions League-ah Atletico Madrid hneh loin an tla. Vawi leh khata Liverpool season ṭha tak chu season ṭha pangngai a ni chho a, chutihrualin league lamah record siam belh turin an dinhmun 

a ṭha.

Manchester United chuan 2000/01 season khan April 14-ah an champion tih an nemnghet a, match nga khelh tur a la awm. Manchester City pawhin 2007/18 khan United record nih rualin April 15-ah champion an nemnghet. 

Liverpool erawh March thla chhung ngeia champion tura ngaih an ni a, amaherawhchu Watford an hneh loh hnuah conoravirus hri a rawn len tak avangin an champion an la nemnghet thei lo. Hei chauh hi a ni lo, tun dinhmunah chuan April thla chanveah pawh Premier League an khelh ṭan hmel loh avangin Reds hi an hmelma United leh City hmain an champion thei lo ang.

Liverpool-in 1989-90 season hnuah league nomawi chawi an inbeisei a, Premier League nomawi hmasa ber la turah an inngai. Jurgen Klopp-a hote khelmualah duhthusama ṭhain an khel a, champion an phu tih chu mitin ngaihdan a ni mah se Covid-19 vangin engmah a chiang ta lo.