Doctor-ten beih an tawh vangin hna thawk duh lo
Telangana khawpui, Hyderabad-a Gandhi Hospital-ah Covid-19 kai enkawl lai pakhat chu a thih avangin a chhungte lungawi loin doctor duty lai pakhat an bei a, hei vang hian he damdawi-ina thawk doctor-te chuan hna an thawk chhunzawm duh lo.
Gandhi Hospital-ah hian Covid-19 kai enkawltu doctor 300 chuang an thawk mek a, he damdawi-ina AMC (acute medical ward)-a dah kum 55 mi chu Thawhlehni khan a thi a ni. A thih hnuah a chhungte chuan doctor duty lai chu beiin, hospital-a bungruate an suasam zui bawk. He damdawi-ina doctor-te hian April 1 khan beih an lo tawk tawh bawk a ni.
Doctor rualte chuan lungawi lohna lantirin an chunga thil thleng chu a hmun ngeia enfiah turin Chief Minister leh Health Minister an phut a, police leh state sorkarin an himna tur an tiamsak an phut bawk. Sorkarin an thil phutte a tihhlawhtlin hma loh chuan hna an thawk chhunzawm tawh dawn rih lo tih Gandhi Junior Doctors Association president Dr Lohith chuan a sawi.