Premier League - April 30 thleng khel dawn lo

Nimin khan video conference hmangin Premier League emergency meeting neih a ni a. Premier League, English Football League leh Football Association te chuan thuchhuah inṭawm siamin coronavirus a darh zel avangin April 30 thleng Premier League khelh a nih loh tur thu an puang. Liverpool tana thu lawmawm a awm - Premier League khelh zawh ngei tum a ni.

England-a inelna sang Premier League, English Football League, Women's Super League leh Women's Championship bakah Scotland, Wales leh Northern Ireland a fixtures zawng zawng pawh an sawn. Football Association Rules and Regulations-ah chuan June 1 hmain league hi zawh ngei tura tih a ni a, amaherawhchu Covid-19 vanga buaina erawh ṭum danga thleng ngai lo a ni a. FA chuan league khelh zawhna tur a nih chuan June 1 hnu lamah pawh inelna zawh an remti a, league zawh hun tur erawh tihchian a la ni lo.

Europe-a football thuneitu sang ber UEFA-in European Championship kumina neih tur nakkum lama a sawn chiah khan Europe-a league hrang hrang tan league khelh zawhna hun ṭha a awm chiah a. English Football-a thuneituten thil awm dan uluk takin an thlir a, Covid-19 darh zel vangin ruahmanna hmasa April 4-a Premier League ṭan theih an beisei lo. Football-a pawimawh ta ber chu player, coaching staff leh mipui himna a ni a, conoravirus vanga buaina reh hunah chauh inelna ṭan theih a ni dawn. Chumi hun chu football ngainatuten 'Tlumtea thlirin' an thlira tun dinhmunah erawh a thlen hun tur rin thiam la harsa. United Kingdom sorkar chuan mipui pungkhawm tur ven nan infiamna neih a khap tlat a, inelna ṭan theih a la ni lo.

Premier League khelh zawh tum a nih takah chuan Liverpool-in a vawi khat nan Premier League nomawi an chawi ngei dawn tihna a ni a, chutihrualin Covid-19 darh zel danin English football hmalam hun thui tak a hril bawk.