India football hma hun a êng lo?

Indian Super League khelh zawh a ni ta a, Indian football ngainatute lu a hai - hming langsar leh ṭha chho tur nia beisei ten beisei an phak loh vang a ni. 

Chutiang player zingah chuan a bik takin Udanta Singh leh Ashique Kuruniyan hming a ri ring a, Udanta hi chu level sangah pawh hming lo chher tawh a nih avangin media lamin an theh lar viau hi a mak hran lo. 

Kuruniyan hi player ṭha tak ni mah se phai media lamin an fak 'over' ve hret niin a lang a, tun season-a Udanta nen, Sunil Chhetri nen Bengaluru tan tlarhmaa an inkawp hi hmuh châkawm viau mah se beisei an phak lo hle. 

'Beisei an phak lo hle' tih hian Chhetri a huam lo a, Udanta leh Kuruniyan hi mang ti angtu an ni - tun season-a an pahnih goal khung belhkhawm chu goal hnih a ni a, Kuruniyan hian assist vawi khat a nei tel. 

Indian player-ten beisei an phak lo a, chumi hmu chiangtu zingah chuan Bengaluru manager Carles Cuadrat a tel - Cuadrat hian India coach Igor Stimac chu a lo manganpui.

Spanish coach hian, "Stimac chu ni ila, ka lu a hai tawh khawp ang," tiin a sawi a, Indian player-te khel ṭha lo lutuk chu national team-in an tawrh dawn avangin Blue Tigers coach hi a lo manganpui deuh a ni. Turkish club lian Galatasaray-a condi-tioning coach lo ni tawh hian Indian player tam tak a lo chher puitling tawh a, mahse mangan rukna a nei tlat. 

Cuadrat chuan, "Chance ka pe hnem tawk tawh a, mahse a chhanna a awm lo. Udanta hian goal khat a khung a, assist a nei lo. Ashique hian goal khung loin assist vawi khat chauh a nei bawk. India tan chuan hei hi thil hlauhawm tak a ni," a ti! (he thu a sawi lai hian Ashique hian goal a khung lo a, semifinal second leg-ah goal khat a rawn khung)

Indian media ten foreign player hman nasat an sawisel nasa a, India-in footballer ṭha a neih theih loh phahah an ngai. Mahse, Cuadrat chuan, "Manager zawng zawngin hmasawn an duh a, ram pawn coach an nih tlangpui avangin India pawn lam an hawi lo thei lo a ni," a ti zui. 

Spanish manager hian a la duhtawk lo - "Tih ngai zawng zawng chu kan ti vek. Video kan en a, hmasawnna tur kan inhrilh a, a ṭul apiang kan ti. Mahse, eng ruai kan ang lo. Kan phak loh kan ban a ni," a ti. Cuadrat-a sawi awmzia chu hei hi a ni - Indian player-te class a la sang tawk lo. Skills an nei lo a, game IQ a sang lo a, an rilruin a phak lo a ni ber!

Spanish coach, khawvela footballer ṭha ber ber kianga lo tal tawh ngaihdan hi a dik lo tih ngawt chi a ni lo a, India kan la ṭha tawk lo a ni e ka u - mangan a hun ta.

India tan Sunil Chhetri chu goal khung khawl a la ni reng a, kum 35 mi a ni tawh chungin India-in a thlakna tur striker a la nei lo - tun season ISL-ah pawh Indian player zinga goal khung hnem ber a la ni a, match 15-ah goal kua a khung. 

Chhetri hnaih bertu Jackichand Singh chuan match 16-ah goal nga a khung a, India kan ropui lo. Chhetri thlak zo ber tura ngaih Jeje Lalpekhlua'n tun season-ah hliam vangin match khelh a la nei lo. Cuadrat chuan, "Farukh Choudhary-a'n bul a ṭan ṭha a, mahse tunah chuan eng a ni leh tawh lo. C. K Vineeth, Robin Singh, Jeje Lalpekhlua leh Balwant Singh-te pawh quality an nei a, mahse an number en ula, dah san an la harsa a ni," a ti!

India-in PK Banerjee, Shabbir Ali, IM Vijayan, Baichung Bhutia leh Sunil Chhetri a lo nei tawh a, kum 35 mi Chhetri chawlh a hnai tawh - tu nge lo ding chhuak ve dawn ta?

Indian player zingah Anirudh Thapa leh Vinit Rai hi tun hnaia media-ten an fak nasat an ni a, beisei an phak chuang lo - Rai hian match 15 a khelhah goal vawi khat a khung a, assist a nei lo. 

Kum 22 mi Thapa a zia hret a, match 20-ah assist vawi ruk a nei - goal khat a khung, khelmuala minute 1754 hmangtu record hi lawma zuanpui chi a ni lo tih a lang. Brandon Fernandes skills hi hahipa an sawi a ni a, number 10 player hian match 17-ah goal hnih khungin assist vawi sarih a nei a, season hmang ṭhaa sawi theih a ni. Sahal Abdul Samad hi an sawi dan leh a tak ram a inthlau hle - match 18-ah goal khung a nei lo a, assist vawi hnih chiah a nei!

Tun season ISL kan en chuan tlarhma bikah Lallianzuala Chhangte leh Jerry Mawihmingthanga chu player langsar an ni. Lianzuala hi Norwegian club-a trial a zuk neih hnuah a hlutna a zual a, ngaihven a hlawh hle. 

Lianzuala hian match 21-ah goal sarih a khung a, Hero of the Match-ah vawi hnih thlan a ni a, Emerging Player of the Match-ah vawi nga thlan a ni. Jerry hian match 17-a khelhah goal hnih a khung a, assist vawi nga a nei. 

Jerry hi Hero of the Match-ah vawi hnih thlan a ni a, Emerging Player of the Match-ah vawi nga thlan a ni bawk. Mahse, Jerry hian buaina pakhat a nei - khelh ṭhat loh ṭum a tawng leh zauh ṭhin. ISL commentator Pulasta Dhar chuan, "Off day tawp neih a ching hi a buaithlak," tiin Vanglaini a hrilh a, hei erawh player huaisen Jerry hian a siam ṭha thei ang. 

Jerry Lalrinzuala leh Laldinliana Renthlei ten season duhawm tak an hmang bawk a, player pahnih hi an khelhna Chennaiyin coach Owen Coyle chuan, "Indian football tan chanchin ṭha a ni," tih hial khawpin an khelh ṭhat thu a sawi. 

NorthEast United midfielder Lalengmawia hi Hero of the Match-ah vawi khat thlan a ni a, Emerging Player of the Match-ah vawi thum thlan a ni bawk. Vaivakawn rawlthar hian match 10-a khelhah 80.45 % passing accuracy a nei thei. Highlanders-ah K. Lalṭhathanga'n season hmasa a phak lo a, Lalrempuia Fanai-in hmun a chang phak lo. ATK-ah Ricky Lallawmawma leh Malsawmzuala ten hmun an chang phak lo a, Sena Ralte chu Real Kashmir lamah loan-in an kaltir. Bengaluru forward Edmund Lalrindika-a'n loan-in East Bengal a zawm a, Sairuatkima a inlan phak lo. Hyderabad-ah R. Laldanmawia chu squad ti kimtu a ni a,  Isaac Vanmalsawma chu Jamshedpur-ah pangngai takin a khel. 

Samuel Lalmuanpuia'n beiseina sang tak nen Kerala Blasters pan mah se hmun a chang meuh lo a, hliam vangin Lalruatthara a inlan tam lo bawk. Mumbai City-ah Hmingthanmawia'n bench pawh a chang phak lo. 

Odisha lamah Lalchhuanmawia a awm a, Chhuantea hi hliam vangin a inlan thei mumal lo thung. Daniel Lalhlimpuia'n Odisha tan match 16 a khel a, mahse minute 619 chhungin goal khung a nei lo - striker tan hna thawk ṭha in tih chi a ni lo. 

Chennaiyin lamah Zotea Ralte chu hliam vangin season tluanin a inlan lo a, Indian football-ah a vanglai hun a vui liam ṭan ve ta angin a sawi theih. A tawi zawnga sawiin Jerry Mawia, Lianzuala, Jerry, Dinliana leh Engmawia te hi tun season ISL-ah chuan Mizoin chhuan tura kan neih te an ni.