Last 16-ah Bayern an lut

Champions League champion lai Bayern Munich chuan an mikhual Red Bull Salzburg chu 3-1 a hnehin last 16 an lut. Group A inkhel dangah Atletico Madrid leh Lokomotiv Moscow chu 0-0 in an inhnehtawk thung.

German champion tan Robert Lewandowski, Kingsley Coman leh Leroy Sane ten goal khat ṭheuh an khung. Mikhual team tan Mergim Berisha-a'n Manuel Neuer paltlangin goal khung ve mah se awmzia a nei tawh lo.

Poland international Lewandowski-a'n UCL-ah goal 71 a khung tling ta a, European football inelna sang berah hian Real Madrid legend Raul nen an goal khung a inzat, an chungah hian Lionel Messi (118 goals) leh Cristiano Ronaldo (131) an awm.

Austrian champions Salzburg hian inkhel tir lamah ball chang tam ve mah se a hmawr an bawk fuh thei lo. Hun tawp dawn lamah Marc Roca hnawhchhuah a nih avangin an tan a harsa, kumin UCL match li an khel tawhah point khat chauh an la hmu.