Atalanta-in Liverpool chelh khawtlai

Liverpool-in Italy-a duhthala an sawp hnu Atalanta chu Anfield-ah an ngam lo a, Italian club lakah 2-0 a an tlawm avangin Champions League last 16 lut tur chuan an nghah leh hret a ngai ang. 

Anfield-a inkhelah Jurgen Klopp-a'n player inhliam a ngah avangin a squad a siksawi nasa a, tlarhnungah Joel Matip kawp turin tawnhriat nei tam lo Neco Williams leh Rhys Williams a khelhtir a, Konstantinos Tsimikas lah Reds tana a match thumna khel ve chauh a ni - Williams pahnih bakah  Curtis Jones chuan bul a ṭan a, Champions League-a British rawlthar, kum 20 tling lo pathumin kum 10 chuanga bul an ṭan hmasak ber a ni. 

A tawi zawnga sawiin Liverpool-in an ṭhat dan berin an khel lo a, Atalanta-in hei hi an chhawr ṭangkai - Josip Ilicic (60') leh Robin Gosens (64')-ten goal khat ve ve an khung.

Klopp-a'n bench aṭanga Roberto Firmino, Diogo Jota, Andrew Robertson leh Fabinho-a luh tir chungin a chhanletna tur an nei thei lo - Mohamed Salah leh Sadio Mane-ten bul an ṭan tih erawh hriat a ṭha.

Liverpool an tlawm avangin last 16 lut tur chuan an match hnuhnung pahniha Ajax (home) leh Midtjylland (away) nena an inkhelah point thum an hlawhchhuah a ngai ang. 

Reds manager Jurgen Klopp chuan, "Game harsa tak a ni a, a phu zawkin hnehna an chang a ni. First half-ah hian a tlangpui thuin game kan titawp tawh ṭhin a, mahse inkhel tam lo kan nau ṭhenkhatte tan kha chuan a harsa deuh a ni," tiin an chak loh a pawm. 

Ajax hian 3-1 in FC Midtjylland an hneh a, Dutch club tan Ryan Gravenberch, Noussair Mazraoui leh David Neres-ten goal khat ṭheuh an khung a, Danish club tana Awer Mabil-a penalty chhuih luhin awmzia a nei lo.

Group D-ah Atalanta leh Ajax-ten point sarih ve ve an nei a, a chung berah an match hmasa pathuma chak vek Liverpool chu point kua nen an awm.