YouTube Song Top 100-ah Sour Candy No.1

Lady Gaga 'Chromatica' album-a mi, tun laia K-pop hmeichhe band lar ber zinga mi, Blackpink a thawhpuina 'Sour Candy' chu Global YouTube Song Top 100-ah pakhatna an nihpui.

He hla hi May 28 khan tihchhuah a ni a, kar khat chungin Billboard Digital Song Sales Chart-ah No. 25 an nihpui thei a, UK Official Single Top 40 Chart-ah a lang nghal bawk a, Spotify Global-ah No. 2 niin, Spotify US-ah No. 3 leh Spotify UK No. 5 a ni bawk.

'Sour Candy' heti taka a lar hi a dangdai hle a, music video an la siam lo a, audio chauh ngaihthlak tur a awm a, chuti chunga hetiang taka a hit hi thil mak tak chu a ni ve hrim hrim a, Gaga hian Blackpink hi a thawhpui fuh hle a tihtheih bawk ang.

K-Pop lam hian keini ram tleirawlte rilru a hneh ang bawk hian khawthlang pawhin an lawm hle a, rimawi huang­chhungah khawvelah an tla na telh telh a ni.

Heti taka Sour Candy hla lar chhan hi a hla thu vang leh a music vang chu ni mah se, Lady Gaga hian a thawhpui Blackpink-te vang a ni tih a hai bik lo tih a chiang a, he hla an siam tirhah pawh khan Blackpink chu talent nei ṭha tak an nih thute pawh a lo sawi tawh a, an member pangana ang a ni thei chu a inchhuan viau tur thute pawh a lo sawi tawh bawk.   

'Stupid Love' singer Lady Gaga studio album thar ber 'Chromatica' chu a hlawhtling zel a, kumin chhunga UK-a album hralh kal ber dinhmun hial a thlen hnuah Billboard lam a run belh zel a, Billboard 200 chart-ah No.1 a ni leh der tawh.

Chumai a ni lo,  Australia, France, Ireland, Italy, Netherlands, New Zealand leh Scotland-ahte pawh album hralh kal ber a ni vek a, heng ram hrang hrang album chart-ah hian No.1 a ni tawh. Gaga hian Billboard 200 chart-ah hian No.1 ni thei album paruk lai a nei ta a ni.

'Chromatica' hi US-ah hian  274,000 equivalent sales units a hmuchhuak tling tawh a, kumin chhunga hmeichhe album tlangzarh zinga tlangzarh kara hralh kal ber record a siam bawk.