HRI LENG KARA KUT
October thla tawp lam kan in lockdown leh tak si avanga Anthurium Festival (virtual) neih tur kha an ṭhulh hlen emaw tih laiin, hei tunah hian neih an lo tum leh a ni maw? A ṭul viau em ni le!
Hri leng karah hri darh lo zawnga tih an tum chuan a pawi dawn em ni tih pawh a ni thei a. Mahse a hri darh leh darh loh lam ai pawhin mipui thinlungah hian ramri buai nen hripui kara khawsak harsa nitin mamawh thil man to em em karah festival rau (spirit) a awm loh hmel. Chuvangin, thlirna dang aṭang chuan mipui thlan lal sawrkar tan chuan thil tih ṭul a ni lem lo ve thei.
He kut hi phuahchawp, Mizo kut pangngai pawh ni lo, central aṭanga hemi pual atana sum lo kal tawh hman ngai si, hman loh chuan kum lo kal zel turah a lo kal tawh loh hlauhawm si ni te pawhin a hria chuan an sawi ve bawk ṭhin awm e.
Hrileng kara mipui khawsak dan tur ruahmanna (SoP) ang hian mipui tel lohna, TV lama lo thlir tur (virtual) pawh ni rawh sek sek, hetiang hian an kalpui thei tak tak ang em?
Event staff, camera crew, item nei tur leh khuallian turte ringawt chauh pawh han kal khawm se. Mitthiah pawh 35 bak punkhawm theih loh laiin TV thlir tur pawh nise heng a festival buaipuitute nen 35 hi chu an pelh a harsa lo khawp ang.
Duh leh sum te chu lo lapse mai mai rawh se. Alu lei tur pawh kan neih loh laia Anthuriam festival lo tih hi a zahthlak. Nitin eichawp phai lam aṭanga kan lakluh ṭhin leh petrol te a van em em lai a festival lo neih hi khawvel a thil inhmeh lo ber a ni.
Kut/ Festival reng reng hi chu mihring nun hlimna leh tlakchham lohna, thil hnianghnar, Pathian, nature leh Khuanu malsawm dawnna aṭanga kan hlim leh lawm (celebrate)na lam a ni tlangpui ṭhin. Kan buai mangan laia kut neih hi chu a zahthlak hrim hrim, a sum lo kalna emaw kal tawh lohna tur lam chu thudang.
A nih hetia social media leh chanchinbu lama sawi vak vak te hi thil ṭul lo a nih bakah sawrkar sawiselna mai mai kan ti a ni thei e.
Lockdown leh inkharkhip reng karah hian mipui tan hei bak tih theih vak awm hek lo. Social media a phun pawh hian ṭangkaina pakhat tal a lo neih takin, hun dangah pawh mipui ṭhahnem ngaihna awka hi a thlawn lo fo a ni lawm ni. Ramri pawh social media aṭangin asin a tam zawkin kan sawi a, kan vei ni.
Kan sawrkar hian tun hun zela kan mamawh hi dah pawimawhin ngaihtuah ṭhin se a va duhawm em.