2020 MTV EMA BTS bawk an langsar fal

2020 MTV Europe Music Awards chu Pathianni khan sem a ni a, Little Mix member-te chuan award sem ceremony hi an host a ni. America lama MTV music awards an sem ang thoin Europe hmun hrang hrang aṭangin performer-te'n show an nei a, ram 180-ah show hi broadcast a ni.

K-Pop super group BTS chu an huhang khawthlang lamah pawh a nat chhunzawm zel a, award pali lai an la.  Best song, best group, best virtual live bakah biggest fans award an la a, Asia leh America lam mai ni lo, Europe khawmualpui lamah pawh ngaihven tak zetin an ngaiven tih a chiang.

Nomination hmu tam ber Lady Gaga chuan best artist award a dawng a, DJ Khaled feat. Drake 'Popstar' chu best video atan thlan a ni. 

Performer zingah hian  Alicia Keys, Doja Cat, Sam Smith leh Zara Larsson-te an tel a, David Guetta Raye, Yungblud leh Karol G-te pawh an tel bawk. 

Kuminah hian category thar pathum- Best Latin, Video for Good, leh Best Virtual Live-te a awm thar a ni. Nomination panga lai hmu Justin Bieber chuan award pakhatmah a dawn loh laiin BTS erawh chuan nomination panga an hmuhna aṭangin pali laiah award an dawng thung.