Chuai thei lo Rebecca Saimawii a vul

Ṭhazual Lengzem chart-ah zaithiam chuai thei lo Rebecca Saimawii 'Ka lung damna' chu pakhatna a ni a, DJI 'Aw Valmawi' chu pahnihna niin Kimkima 'Leikapui run ka bel' chu pathumna a ni.

Rebecca Saimawii hla 'Ka lung damna' chu rinlawk ang ngeiin chart No.1 a rawn ni ta a, a vanglaini a chuai thei dawn lo ni berin a lang.

Thla thum vel liam taah khan 'Ngaih lungrun' tih hla hmangin Pi Makuri hi comeback a, a hit nghal hle a nih kha. Thla hnih vel liam taah kha 'Ka lung damna' hi a rawn tichhuak leh a, a rawn thlawh fuh leh hle , Ṭhazual chart-ah No.1 a rawn ni leh ta der mai. Ṭhang hnih thum zet liam ta velah khan Rebecca-i hian a zaithiamna leh a hla mawi tak tak hmangin Zofate min lo awi tawh ṭhin a, thawm a neih loh vang vang hnuah tunhnaiah hla ṭha tak tak hmangin min rawn awi leh ta hi a zai lo ngaina ṭhintute beng a fah hle tih a hriat a, rei lote music scene-a a rawn let leh hnuah Ṭhazual chart a rawn thunun der a ni.

'Ka lung damna' music video hi a hmuhnawm a, Pi Makuri'n a zeina a la hloh lo a, a music video pawh a hmuhnawm hle. YouTube lamah pawh rei loteah mi nuai chuangin an thlir der tawh a, chart hi eng ang chena rei nge a thunun theih dawn tih hriat a chakawm tawh hle.

Chart hmasaa pathumna DJI' Aw Valmawi' chuan a dinhmun a rawn sawh nghet zel a, pahnihna a rawn ni der tawh. Chart lehah Rebecca Saimawii a rawn nek chhuak thei dawn em tih hriat a chakawm tawh a, pakhatna ni tur pawhin a dinhmun a ṭha sawt hle.

Tunlai zaithiam zinga huhang ngah ber pawl Kimkima 'Leikapui run ka bel' chu pathumna a ni bawk a, ṭhangthar zinga tlana tak Kimkima pawh hian a dinhmun a sawh nghet zual zel a ni.

Lengzem chart top 10-a langte hi an ṭha rual hle. Rpa Ralte 'Strawberry' chu palina niin Marina Varte 'Nang kher ka lo tawn che' chu pathumna a ni bawk.

Top 10-ah hian Feli Fanai. Awmtea Polymer leh Sangkimi te hming pawh hmuh tur a awm a, a ngaihnawm chho zel dawn a ni.